ઇસ્લામાબાદ: પશ્ચિમ એશિયામાં ચાલી રહેલા ભારે તણાવ અને યુદ્ધની સ્થિતિ વચ્ચે ઈરાને તેના પાડોશી દેશ પાકિસ્તાનને એક મોટી રાજદ્વારી અને આર્થિક 'ગિફ્ટ' આપી છે. આંતરરાષ્ટ્રીય મીડિયા અને વિવિધ અરબી તથા ઉર્દુ અખબારોના અહેવાલો અનુસાર, ઈરાને પાકિસ્તાનના ૨૦ જેટલા વેપારી જહાજોને વ્યૂહાત્મક રીતે અત્યંત મહત્વપૂર્ણ એવી હોર્મુઝની સામુદ્રધુનીમાંથી સુરક્ષિત રીતે પસાર થવાની વિશેષ મંજૂરી આપી દીધી છે. આ સમજૂતી હેઠળ દરરોજ પાકિસ્તાનના ૨ જહાજો આ માર્ગ પરથી પસાર થઈ શકશે.

ઉલ્લેખનીય છે કે, હાલમાં લાલ સમુદ્ર અને હોર્મુઝની સામુદ્રધુની આસપાસના વિસ્તારોમાં હુથી વિદ્રોહીઓ અને ઈરાની દળો દ્વારા પશ્ચિમી દેશોના જહાજો પર સતત હુમલાઓ થઈ રહ્યા છે, જેના કારણે વૈશ્વિક વેપાર ખોરવાયો છે. આવી સ્થિતિમાં, ગંભીર આર્થિક સંકટનો સામનો કરી રહેલા પાકિસ્તાન માટે ઈરાનનો આ નિર્ણય સંજીવની સમાન માનવામાં આવી રહ્યો છે.

ડિજિટલ મીડિયા પ્લેટફોર્મ એક્સ પર પાકિસ્તાની વિદેશ મંત્રાલય અને આંતરરાષ્ટ્રીય બાબતોના નિષ્ણાતો આ પગલાંને બે દેશો વચ્ચે વધતી નિકટતા તરીકે જોઈ રહ્યા છે. આ મંજૂરી મળવાથી પાકિસ્તાનનો અટવાયેલો માલસામાન અને ઇંધણનો પુરવઠો હવે સરળતાથી તેમના બંદરો સુધી પહોંચી શકશે. ઈરાનના આ નિર્ણયે અમેરિકા સહિતના પશ્ચિમી દેશોનું પણ ધ્યાન ખેંચ્યું છે, કારણ કે તે આ વિસ્તારમાં બદલાતા ભૌગોલિક-રાજકીય સમીકરણોનો સંકેત આપે છે.