ન્યૂયોર્ક: ઉત્તર કોરિયાના તાનાશાહ કિમ જોંગ ઉને વધુ એક વખત ઉશ્કેરણીજનક પગલું ભરીને અમેરિકન રાષ્ટ્રપતિ ડોનાલ્ડ ટ્રમ્પ અને પશ્ચિમી દેશોની ઊંઘ હરામ કરી દીધી છે. આંતરરાષ્ટ્રીય સમાચાર એજન્સીઓ અને કોરિયન મીડિયાના સત્તાવાર અહેવાલો અનુસાર, નોર્થ કોરિયાએ પોતાના સૈન્ય અભિયાનને વધુ આક્રમક વેગ આપતા એક અત્યંત શક્તિશાળી અને આધુનિક 'સોલિડ-ફ્યુઅલ' રોકેટ એન્જિનનું સફળ પરીક્ષણ કર્યું છે. આ એન્જિન ખાસ કરીને ઇન્ટરકોન્ટિનેન્ટલ બેલેસ્ટિક મિસાઈલ (આઈ.સી.બી.એમ.) માટે બનાવવામાં આવ્યું છે.

આ પરીક્ષણનો મુખ્ય હેતુ એવી ખતરનાક મિસાઈલો વિકસાવવાનો છે જે નોર્થ કોરિયાથી સીધી અમેરિકાની મુખ્ય ભૂમિ સુધી પહોંચીને તબાહી મચાવી શકે. સંરક્ષણ નિષ્ણાતોના મતે, 'પ્રવાહી ઈંધણ' (લિક્વિડ ફ્યુઅલ) ની સરખામણીમાં 'સોલિડ ફ્યુઅલ' (ઘન ઈંધણ) વાળી મિસાઈલોને લોન્ચ કરવી ખૂબ જ ઝડપી અને આસાન હોય છે. તેને અગાઉથી જ ઈંધણ ભરીને રાખી શકાય છે, જેના કારણે અમેરિકન સેટેલાઈટ્સ માટે તેને લોન્ચ કરતા પહેલા ટ્રેક કરવી લગભગ અશક્ય બની જાય છે.

સોશિયલ મીડિયા અને પશ્ચિમી અખબારોના અહેવાલો મુજબ, આ પરીક્ષણ બાદ અમેરિકન રક્ષા મંત્રાલય પેન્ટાગોનમાં ઉચ્ચ સ્તરીય બેઠકોનો દોર શરૂ થઈ ગયો છે. ઉત્તર કોરિયાના આ સતત ઉશ્કેરણીજનક વલણથી કોરિયન દ્વીપકલ્પમાં તણાવ ચરમસીમાએ પહોંચી ગયો છે. નિષ્ણાતો માની રહ્યા છે કે આગામી સમયમાં કિમ જોંગ ઉન કોઈ મોટી મિસાઈલનું જીવંત પરીક્ષણ પણ કરી શકે છે, જે અમેરિકા માટે સીધો અને મોટો પડકાર સાબિત થશે.