પ્યોંગયાંગ: વિશ્વભરમાં જ્યારે યુદ્ધના વાદળો છવાયેલા છે ત્યારે ઉત્તર કોરિયાએ પોતાની સૈન્ય તાકાતનું પ્રદર્શન કરીને અમેરિકા અને ખાસ કરીને રાષ્ટ્રપતિ ડોનાલ્ડ ટ્રમ્પની ચિંતામાં ધરખમ વધારો કર્યો છે. નોર્થ કોરિયાએ એક અત્યંત શક્તિશાળી અને આધુનિક 'સોલિડ-ફ્યુઅલ' રોકેટ એન્જિનનું સફળ પરીક્ષણ કરીને દુનિયાને ચોંકાવી દીધી છે. આ એન્જિનનો મુખ્ય હેતુ એવી ઈન્ટરકોન્ટિનેન્ટલ બેલેસ્ટિક મિસાઈલો (ICBM) તૈયાર કરવાનો છે જે સીધી અમેરિકાના મુખ્ય ભૂભાગ સુધી પહોંચીને તબાહી મચાવવાની ક્ષમતા ધરાવતી હોય. ઉત્તર કોરિયાની સરકારી ન્યૂઝ એજન્સી KCNA મુજબ, આ નવું અપગ્રેડેડ એન્જિન અગાઉના તમામ મોડલ કરતા અનેકગણું વધુ શક્તિશાળી છે.

આ સફળ પરીક્ષણ દરમિયાન ઉત્તર કોરિયાના સર્વોચ્ચ નેતા કિમ જોંગ ઉન પોતે વ્યક્તિગત રીતે હાજર રહ્યા હતા અને મિસાઈલની ક્ષમતાનું નિરીક્ષણ કર્યું હતું. તેમણે આ સિદ્ધિને દેશની વ્યૂહાત્મક સૈન્ય શક્તિ વધારવાની દિશામાં એક ઐતિહાસિક સોપાન ગણાવ્યું હતું. સંસદમાં આપેલા પોતાના ધારદાર ભાષણ દરમિયાન કિમે નોર્થ કોરિયાને અજેય પરમાણુ શક્તિ તરીકે સ્થાપિત કરવાનો મક્કમ સંકલ્પ દોહરાવ્યો હતો. આ સાથે જ તેમણે ઈરાન-અમેરિકા યુદ્ધના સંદર્ભમાં વોશિંગ્ટન પર 'રાજકીય આતંકવાદ' ફેલાવવાનો ગંભીર આરોપ મૂકીને અમેરિકા સામે આડકતરી રીતે જંગનું એલાન કર્યું છે.

સૈન્ય નિષ્ણાતોના મતે, સોલિડ-ફ્યુઅલ મિસાઈલો લિક્વિડ-ફ્યુઅલ મિસાઈલો કરતા અનેકગણી વધુ ખતરનાક અને અનિશ્ચિત હોય છે. લિક્વિડ-ફ્યુઅલ મિસાઈલોને લોન્ચ કરતા પહેલા ઈંધણ ભરવામાં કલાકોનો સમય લાગે છે, જેના કારણે સેટેલાઈટ દ્વારા તેને સરળતાથી ટ્રેક કરી શકાય છે. તેનાથી વિપરીત, સોલિડ-ફ્યુઅલ મિસાઈલોને ગમે ત્યારે અને અત્યંત ઓછા સમયમાં લોન્ચ કરી શકાતી હોવાથી દુશ્મન દેશની ડિફેન્સ સિસ્ટમ માટે તેને હવામાં અટકાવવી લગભગ અશક્ય બની જાય છે. આ ટેકનોલોજીની મદદથી હવે ઉત્તર કોરિયા એક જ મિસાઈલ પર એકથી વધુ પરમાણુ હથિયારો ગોઠવીને અમેરિકાના મિડ-વેસ્ટર્ન ડિફેન્સ કવચને છિન્ન-ભિન્ન કરવાની તૈયારીમાં છે.

છેલ્લા પાંચ વર્ષથી ચાલી રહેલા સૈન્ય આધુનિકીકરણ કાર્યક્રમે ઉત્તર કોરિયાને મિસાઈલ શક્તિના શિખર પર પહોંચાડી દીધું છે. જોકે, વિદેશી નિષ્ણાતો માને છે કે મિસાઈલને અંતરિક્ષમાંથી પૃથ્વીના વાતાવરણમાં સુરક્ષિત રીતે પુનઃ પ્રવેશ (Reentry) કરાવવાની જટિલ ટેકનિકમાં હજુ પણ નોર્થ કોરિયાએ ઘણી મજલ કાપવાની બાકી છે. આમ છતાં, આ નવા એન્જિનના પરીક્ષણે સાબિત કરી દીધું છે કે કિમ જોંગ ઉન કોઈપણ ભોગે અમેરિકાને તેની સરહદ સુધી પડકારવા માંગે છે. હવે જોવાનું એ રહેશે કે ટ્રમ્પ પ્રશાસન ઉત્તર કોરિયાના આ નવા પડકારનો સામનો કઈ રીતે કરે છે.