તેહરાન:  પશ્ચિમ એશિયામાં ચાલી રહેલું ઈરાન-ઈઝરાયેલ યુદ્ધ હવે અત્યંત ભયજનક વળાંક લઈ રહ્યું છે. ઈરાનના શક્તિશાળી લશ્કરી સંગઠન 'ઇસ્લામિક રિવોલ્યુશનરી ગાર્ડ કોર્પ્સ' (IRGC) એ રવિવારે એક સત્તાવાર નિવેદન જારી કરીને પશ્ચિમ એશિયાના વિવિધ દેશોમાં કાર્યરત અમેરિકન યુનિવર્સિટીઓના કેમ્પસ પર હુમલો કરવાની સીધી અને ગંભીર ધમકી આપી છે. ઈરાનનો આરોપ છે કે અમેરિકા અને ઈઝરાયેલ દ્વારા કરવામાં આવેલા તાજેતરના હવાઈ હુમલાઓમાં ઈરાનની બે પ્રતિષ્ઠિત યુનિવર્સિટીઓ સંપૂર્ણપણે નાશ પામી છે. આ હુમલાના બદલામાં હવે ઈરાન પ્રદેશમાં અમેરિકી શૈક્ષણિક સંસ્થાઓને નિશાન બનાવવાની તૈયારી કરી રહ્યું છે, જેનાથી શૈક્ષણિક આલમમાં ભારે ફફડાટ ફેલાઈ ગયો છે.

ઈરાની રિવોલ્યુશનરી ગાર્ડ દ્વારા જારી કરાયેલા અલ્ટીમેટમમાં સ્પષ્ટ જણાવાયું છે કે જો અમેરિકા આ હુમલાઓનો સામનો કરવા તૈયાર ન હોય તો તેણે તાત્કાલિક પગલાં લેવા પડશે. નિવેદનમાં કહેવામાં આવ્યું છે કે, "જો યુએસ સરકાર ઈચ્છતી હોય કે આ પ્રદેશમાં તેની યુનિવર્સિટીઓ અમારા બદલાના હુમલાથી મુક્ત રહે, તો તેણે સોમવાર, ૩૦ માર્ચ, તેહરાન સમય મુજબ બપોરે ૧૨ વાગ્યા સુધીમાં ઈરાની યુનિવર્સિટીઓ પર થયેલા બોમ્બ ધડાકાની કડક શબ્દોમાં નિંદા કરવી પડશે." આ ધમકી સીધી રીતે અમેરિકી પ્રશાસન પર દબાણ લાવવાનો પ્રયાસ છે અને યુદ્ધના દાયરાને વિસ્તૃત કરવાની સંકેત આપે છે.

આ ધમકીની ગંભીરતાને ધ્યાનમાં લેતા, ઈરાને ખાડી દેશોમાં આવેલી યુએસ યુનિવર્સિટીઓના કર્મચારીઓ, પ્રોફેસરો, વિદ્યાર્થીઓ અને આસપાસના રહેવાસીઓને મોટી ચેતવણી આપી છે. ઈરાની મીડિયા દ્વારા પ્રકાશિત નિવેદનમાં ઉમેરવામાં આવ્યું છે કે, "અમે આ પ્રદેશમાં આવેલી અમેરિકન યુનિવર્સિટીઓના તમામ લોકોને કેમ્પસથી ઓછામાં ઓછા એક કિલોમીટર દૂર રહેવાની સલાહ આપીએ છીએ." આ ધમકી બાદ કતારમાં આવેલી ટેક્સાસ એ એન્ડ એમ યુનિવર્સિટી અને સંયુક્ત આરબ અમીરાત (UAE) માં ન્યૂ યોર્ક યુનિવર્સિટી જેવા પ્રતિષ્ઠિત અમેરિકી કેમ્પસ પર હુમલાનો ભય વાસ્તવિક બની ગયો છે, જે આ દેશોની સુરક્ષા વ્યવસ્થા માટે પણ મોટો પડકાર છે.

ઉલ્લેખનીય છે કે, શુક્રવાર અને શનિવારની મધ્યરાત્રિએ થયેલા ભયાનક હવાઈ હુમલાઓમાં ઈરાનની રાજધાની તેહરાનના ઉત્તરપૂર્વમાં આવેલી યુનિવર્સિટી ઓફ સાયન્સ એન્ડ ટેકનોલોજીને ભારે નુકસાન થયું હતું. અહેવાલો મુજબ, હુમલામાં યુનિવર્સિટીની ઇમારતો ધ્વસ્ત થઈ ગઈ હતી, જોકે સદનસીબે કોઈ જાનહાનિ થઈ ન હતી. આ હુમલા બાદ ઈરાનનો આક્રોશ ચરમસીમા પર છે અને રિવોલ્યુશનરી ગાર્ડ હવે શૈક્ષણિક સંસ્થાઓને યુદ્ધના મેદાનમાં ધકેલીને નવો આયામ સજી રહ્યા છે, જે સમગ્ર પશ્ચિમ એશિયાને વધુ અસ્થિરતા તરફ ધકેલી શકે છે.