બાલાઘાટ: મધ્યપ્રદેશના બાલાઘાટ જિલ્લામાં શનિવારે મધરાત્રે એક અત્યંત કરૂણ અને કંપારી છૂટી જાય તેવો અકસ્માત સર્જાયો છે. બૈહર પોલીસ સ્ટેશન વિસ્તાર હેઠળના કેવલારી ચોક પાસે પૂરપાટ ઝડપે જતી એક અલ્ટો કાર અચાનક ચાલકે કાબુ ગુમાવતા રસ્તાની બાજુમાં પલટી ખાઈ ગઈ હતી. કાર પલટી જવાની સાથે જ તેમાં શોર્ટ સર્કિટને કારણે ભીષણ આગ ફાટી નીકળી હતી. આગ એટલી ઝડપથી પ્રસરી કે કારમાં સવાર છ લોકોમાંથી ત્રણ લોકોને બહાર નીકળવાની તક પણ મળી ન હતી અને તેઓ કારની અંદર જ જીવતા ભૂંજાયા હતા. મૃતકોમાં ૬૫ વર્ષીય નાગરચી કેલકર, ૨૮ વર્ષીય સવિતા કેલકર અને માત્ર ૩ વર્ષનો માસૂમ અભિ કેલકર સામેલ છે. આ હૃદયદ્રાવક ઘટનાને પગલે સમગ્ર પંથકમાં અરેરાટી વ્યાપી ગઈ છે.

અકસ્માત સમયે ત્યાંથી પસાર થઈ રહેલા રાહદારીઓએ માનવતા દાખવીને તાત્કાલિક બચાવ કામગીરી શરૂ કરી હતી. લોકોએ હિંમત બતાવી કારની બારીના કાચ તોડી નાખ્યા હતા અને ૮ વર્ષની બાળકી પૂર્વી રાહંગડાલેને હેમખેમ બહાર કાઢી લીધી હતી. ત્યારબાદ ગંભીર રીતે દાઝી ગયેલા ડ્રાઈવર સીતમ કેલકર અને તેની માતા નાનાબાઈ કેલકરને પણ ભારે જહેમત બાદ બહાર કાઢવામાં સફળતા મળી હતી. ઘાયલોને તાત્કાલિક સારવાર અર્થે બૈહરના કોમ્યુનિટી હેલ્થ સેન્ટરમાં ખસેડવામાં આવ્યા છે. મળતી માહિતી મુજબ, સીતમ કેલકર પોતાના વતન ગામ પોંડીથી પુની પરત ફરી રહ્યો હતો ત્યારે આ કાળમુખો અકસ્માત નડ્યો હતો. તે પુનીમાં વેલ્ડિંગની દુકાન ચલાવી પરિવારનું ગુજરાન ચલાવતો હતો.

પોલીસની પ્રાથમિક તપાસમાં બહાર આવ્યું છે કે અકસ્માત કદાચ ડ્રાઈવરને ઝોકું આવી જવાને કારણે અથવા વાહનની વધુ પડતી ગતિને કારણે સર્જાયો હોઈ શકે છે. માલજખંડ રોડ પર વળાંક લીધા પછી કાર સીધી રસ્તા પરથી નીચે ઉતરી ગઈ હતી અને પલટી મારી ગઈ હતી. બૈહર ટીઆઈ જયંત મેર્કોલેએ જણાવ્યું હતું કે ડાયલ ૧૧૨ પરથી મળેલી માહિતી બાદ પોલીસ કાફલો ઘટનાસ્થળે પહોંચ્યો હતો. જોકે, આગ એટલી વિકરાળ હતી કે ત્રણ લોકોના મૃતદેહ કારમાંથી બહાર કાઢવા મુશ્કેલ બન્યા હતા. હાલમાં પોલીસે અકસ્માતે મોતના ગુનો નોંધી વધુ તપાસ હાથ ધરી છે. આ ઘટનાએ ફરી એકવાર રાત્રિના સમયે ડ્રાઈવિંગમાં રાખવી પડતી સાવચેતી અને વાહનોમાં ફાયર સેફ્ટીના મહત્વ પર સવાલ ઉભા કર્યા છે.