થાણે: ઈલેક્ટ્રિક ટુ-વ્હીલર ક્ષેત્રની દિગ્ગજ કંપની ઓલા ઇલેક્ટ્રિકને ગ્રાહક સુરક્ષાના મામલે ભારે ક્ષોભજનક સ્થિતિમાં મુકાવવાનો વારો આવ્યો છે. ઠાણે જિલ્લા ગ્રાહક તકરાર નિવારણ પંચે કંપનીને ગંભીર બેદરકારી બદલ ફટકાર લગાવીને ગ્રાહકને તેનું ખામીયુક્ત સ્કૂટર સમાન ફીચર્સ ધરાવતા નવા વાહન સાથે બદલી આપવા અથવા ૬% વાર્ષિક વ્યાજ સાથે ₹૯૬,૯૯૭ની સંપૂર્ણ રકમ પરત કરવાનો ઐતિહાસિક આદેશ આપ્યો છે. આ કેસમાં સૌથી નોંધપાત્ર બાબત એ રહી કે કંપનીએ ગ્રાહકની વારંવારની ફરિયાદો કે આયોગની નોટિસનો કોઈ લેખિત જવાબ આપ્યો ન હતો કે ન તો તેમના કોઈ પ્રતિનિધિ કોર્ટમાં હાજર રહ્યા હતા, જેના પગલે આયોગે ઉપલબ્ધ પુરાવાઓના આધારે એકતરફી ચુકાદો જાહેર કર્યો છે.

આ સમગ્ર વિવાદની વિગતો મુજબ, નવી મુંબઈના એક વકીલે જુલાઈ ૨૦૨૪માં ઓલાનું ઇલેક્ટ્રિક સ્કૂટર ખરીદ્યું હતું, પરંતુ ડિલિવરીના માત્ર બે જ દિવસ બાદ પહેલી લાંબી સવારી દરમિયાન વાહન અધવચ્ચે અટકી પડવાની અને એક્સિલરેશનમાં ખામીની સમસ્યાઓ શરૂ થઈ હતી. ઓગસ્ટ ૨૦૨૪માં એક ભયાનક અનુભવમાં બેટરીનું ચાર્જિંગ માત્ર ૫૦૦ મીટરના અંતરમાં ૨૧% થી સીધું ઘટીને ૩% થઈ ગયું હતું, જેને કારણે સ્કૂટર ટ્રાફિક વચ્ચે અચાનક બંધ થઈ ગયું હતું. ફરિયાદીએ આક્ષેપ કર્યો હતો કે આ ટેકનિકલ ખામીને કારણે કોઈ મોટી દુર્ઘટના સર્જાઈ શકી હોત. કંપનીએ સોશિયલ મીડિયા પર ફરિયાદ કર્યા બાદ વાહન સર્વિસ માટે લીધું ખરું, પરંતુ મહિનાઓ સુધી કોઈ અપડેટ આપ્યું નહીં અને જ્યારે વાહન પરત મળ્યું ત્યારે તે ગંદુ અને અનેક સ્ક્રેચથી લથબથ હતું.

ગ્રાહક આયોગે પોતાના નિરીક્ષણમાં નોંધ્યું હતું કે વાહનની બેટરી અને પરફોર્મન્સમાં શરૂઆતથી જ જોવા મળેલી ખામીઓ ઉત્પાદનમાં ક્ષતિ હોવાનું સ્પષ્ટ કરે છે. આયોગે કંપનીના વલણને 'અન્યાયી વેપાર પ્રથા' અને ગ્રાહક પ્રત્યેની ઘોર બેદરકારી ગણાવી હતી. વળતર તરીકે મૂળ રકમ અને વ્યાજ ઉપરાંત, ગ્રાહકને પડેલી માનસિક યાતના બદલ ₹૨૦,૦૦૦ અને કાનૂની લડતના ખર્ચ પેટે ₹૧૫,૦૦૦ની ચુકવણી કરવાનો પણ આદેશ કરાયો છે. ઓલા ઇલેક્ટ્રિક માટે આ ચુકાદો એક મોટા બોધપાઠ સમાન છે, કારણ કે હાલના સમયમાં ઇલેક્ટ્રિક વાહનોની વિશ્વસનીયતા અને વેચાણ પછીની સર્વિસ (After-sales service) ગ્રાહકો માટે સૌથી મહત્વની કસોટી બની રહી છે.