પુરુલિયા : પશ્ચિમ બંગાળ વિધાનસભા ચૂંટણી ૨૦૨૬ના પ્રચાર અભિયાનમાં રવિવારે રાજકીય પારો ચરમસીમાએ પહોંચ્યો હતો. પુરુલિયામાં આયોજિત એક વિશાળ જનસભાને સંબોધતા મુખ્યમંત્રી મમતા બેનર્જીએ કેન્દ્રીય ગૃહમંત્રી અમિત શાહ અને ભાજપ પર શાબ્દિક પ્રહારોની ઝડી વર્ષાવી હતી. તેમણે અત્યંત આક્રમક તેવરમાં પૂછ્યું હતું કે, દેશમાં થયેલા વિવિધ રમખાણોમાં કેટલા લોકોએ જીવ ગુમાવ્યા તેનો હિસાબ પહેલા આપવો જોઈએ. દીદીએ ભાજપને એક 'ઘૃણાસ્પદ' પક્ષ ગણાવતા આક્ષેપ કર્યો હતો કે જો રાજ્યમાં ભગવો લહેરાશે તો લોકોની પસંદગીનું ભોજન લેવાની આઝાદી છીનવાઈ જશે અને લોકપ્રિય 'લક્ષ્મી ભંડાર' જેવી કલ્યાણકારી યોજનાઓ પર તાળા મારી દેવામાં આવશે.

પોતાની જૂની ઈજાઓ અને અમિત શાહના નિવેદનોનો ઉલ્લેખ કરતા મમતા બેનર્જીએ ભાવુક અને રોષપૂર્ણ અંદાજમાં જણાવ્યું હતું કે, વિરોધીઓએ તેમને શારીરિક રીતે નુકસાન પહોંચાડવાના અનેક પ્રયાસો કર્યા છે. તેમણે દાવો કર્યો કે ગત ચૂંટણી વખતે તેમને થયેલી પગની ઈજા પાછળ રાજકીય કાવતરું હતું અને હવે ફરીથી તેમને નિશાન બનાવવાની પેરવી થઈ રહી છે. શાહને 'સરમુખત્યાર' ગણાવતા તેમણે ઉમેર્યું કે ભાજપ શાસિત રાજ્યોમાં આદિવાસીઓ અને દલિતો સુરક્ષિત નથી, ત્યાં સતત શોષણની ઘટનાઓ બની રહી છે. કેન્દ્ર સરકાર માત્ર લોકોના અધિકારો છીનવવામાં માને છે અને આ વખતે બંગાળની જનતા તેમને જડબાતોડ જવાબ આપશે તેવો વિશ્વાસ તેમણે વ્યક્ત કર્યો હતો.

ચૂંટણી પ્રચાર દરમિયાન મમતા બેનર્જીએ માત્ર ભાજપ જ નહીં પરંતુ ચૂંટણી પંચની કાર્યપ્રણાલી પર પણ ગંભીર સવાલો ઉઠાવ્યા હતા. તેમણે આરોપ લગાવ્યો કે પંચ પક્ષપાતી વલણ અપનાવી રહ્યું છે અને જાણી જોઈને બંગાળના કાર્યક્ષમ આઈએએસ તથા આઈપીએસ અધિકારીઓની બદલી કરીને વહીવટીતંત્રનું અપમાન કરવામાં આવી રહ્યું છે. મહાપુરુષોના નામનો ઉલ્લેખ કરતા તેમણે કહ્યું કે જે પક્ષને બંગાળના સંસ્કારો અને ઇતિહાસની સમજ નથી, તેઓ રવિન્દ્રનાથ ટાગોર અને વિવેકાનંદના વારસાને ક્યારેય સમજી શકશે નહીં. દીદીના આ આકરા તેવરે બંગાળના રાજકારણમાં ગરમાવો લાવી દીધો છે અને આગામી દિવસોમાં આ જંગ વધુ રોમાંચક બનવાના સંકેતો આપ્યા છે.