હૈદરાબાદ:સોશિયલ મીડિયા પર પોતાના ગીતોથી સનસનાટી મચાવનાર યુવા ગાયક અર્પિત બાલા હાલમાં એક વિવાદિત ઘટનાને કારણે ચર્ચાના કેન્દ્રમાં છે. હૈદરાબાદના એક જાણીતા ક્લબમાં આયોજિત લાઈવ મ્યુઝિક કોન્સર્ટ દરમિયાન જ્યારે હજારો ચાહકો સંગીતના તાલે ઝૂમી રહ્યા હતા, ત્યારે અચાનક ભીડમાંથી કોઈ અજાણ્યા શખ્સે સ્ટેજ તરફ પાણીની બોટલ ફેંકી હતી. આ અણધાર્યા હુમલાથી અર્પિત બાલા અત્યંત ગુસ્સે ભરાયો હતો અને તેણે તુરંત જ પોતાનું ગાવાનું બંધ કરી દીધું હતું. ગુસ્સામાં લાલચોળ થયેલા ગાયકે સ્ટેજ પરથી જ તે દિશામાં જોયું જ્યાંથી બોટલ આવી હતી અને પ્રેક્ષકોની હાજરીમાં જ અત્યંત આકરી પ્રતિક્રિયા આપી હતી.

વાયરલ થઈ રહેલા વીડિયોમાં જોવા મળે છે કે અર્પિત બાલાએ માત્ર શખ્સને ફટકાર્યો જ નહીં, પરંતુ ગુસ્સાના આવેશમાં આવીને તે શખ્સ તરફ થૂંક્યો પણ હતો. તેણે સ્ટેજ પરથી માઇક દ્વારા કડક શબ્દોમાં ચેતવણી આપતા કહ્યું કે કોઈપણ કલાકાર સાથે આવું વર્તન સાંખી લેવામાં આવશે નહીં. તેણે સ્પષ્ટ કર્યું કે ભલે કોઈએ ટિકિટ ખરીદી હોય, પરંતુ તેનો અર્થ એ નથી કે તે કલાકારનું અપમાન કરી શકે. ગાયકે તે બોટલ પાછી ભીડ તરફ ફેંકી દીધી હતી અને ત્યાં હાજર સુરક્ષા કર્મચારીઓને સૂચના આપી હતી કે આ અશોભનીય કૃત્ય કરનાર વ્યક્તિને તાત્કાલિક કાર્યક્રમ સ્થળથી બહાર કાઢી મૂકવામાં આવે.

આ ઘટના બાદ સોશિયલ મીડિયા પર લોકોના બે જૂથ પડી ગયા છે. કેટલાક ચાહકો અર્પિત બાલાના સમર્થનમાં છે અને કહી રહ્યા છે કે કલાકારની સુરક્ષા અને સન્માન જળવાવું જોઈએ, જ્યારે અન્ય લોકો ગાયક દ્વારા સ્ટેજ પર થૂંકવાની અને અસંયમિત ભાષાના ઉપયોગની ટીકા કરી રહ્યા છે. ફરીદાબાદના વતની અર્પિત બાલા "બરગડ" ગીતથી રાતોરાત લોકપ્રિય થયા હતા, પરંતુ હૈદરાબાદની આ ઘટનાએ તેમની છબી પર સવાલો ઊભા કર્યા છે. જોકે, હંગામા બાદ પરિસ્થિતિ થાળે પડી હતી અને ગાયકે ફરીથી શો શરૂ કર્યો હતો, પરંતુ આ વિવાદનો વીડિયો અત્યારે ઈન્ટરનેટ પર જોરદાર વાયરલ થઈ રહ્યો છે.