કાઠમંડુ:નેપાળના રાજકારણમાં હાલમાં કોઈ હાઈ-વોલ્ટેજ ડ્રામા જેવી સ્થિતિ સર્જાઈ છે, જ્યાં નવા વડાપ્રધાન બાલેન શાહે ભ્રષ્ટાચારીઓ સામે લાલ આંખ કરતા સત્તાના ગલિયારાઓમાં ફફડાટ વ્યાપી ગયો છે. કાઠમંડુના મહારાજગંજ વિસ્તારમાં વહેલી સવારે દરોડો પાડીને પોલીસે નેપાળી કોંગ્રેસના કદાવર નેતા અને પૂર્વ ઉર્જા મંત્રી દીપક ખડકાની ધરપકડ કરી છે. આ કાર્યવાહી ગયા વર્ષે સપ્ટેમ્બરમાં ફાટી નીકળેલી 'ગેન્જી ચળવળ' દરમિયાન સામે આવેલા આશ્ચર્યજનક પુરાવાઓના આધારે કરવામાં આવી છે. જ્યારે ઉશ્કેરાયેલા ટોળાએ ખડકાના ઘર પર હુમલો કરી આગ લગાવી હતી, ત્યારે હવામાં ચલણી નોટોના ટુકડા ઉડતા જોવા મળ્યા હતા, જેના વીડિયો સોશિયલ મીડિયા પર વાયરલ થયા બાદ ફોરેન્સિક તપાસમાં આ નોટો કાળા નાણાંનો હિસ્સો હોવાની પુષ્ટિ થઈ હતી.

દીપક ખડકા સામેની આ તપાસ માત્ર મની લોન્ડરિંગ સુધી સીમિત નથી, પરંતુ તેમના કાર્યકાળ દરમિયાન જળવિદ્યુત પ્રોજેક્ટ્સ અને હોટલ ઉદ્યોગમાં મેળવેલા ગેરકાયદેસર કોન્ટ્રાક્ટ્સ પર પણ પ્રશ્નો ઉભા થયા છે. નેપાળ વીજળી સત્તામંડળના લોકપ્રિય અધિકારી કુલ માન ઘિસિંગ સાથેનો તેમનો જૂનો વિવાદ અને નેપાળ સ્કાઉટ્સની કિંમતી જમીન પચાવી પાડવાના ગંભીર આરોપોએ તેમની મુશ્કેલીમાં વધારો કર્યો છે. નેપાળ પોલીસના સેન્ટ્રલ ઇન્વેસ્ટિગેશન બ્યુરો (CIB) એ સ્પષ્ટ કર્યું છે કે મની લોન્ડરિંગ વિભાગની વિનંતી બાદ આ કડક કાર્યવાહી કરવામાં આવી છે. રાજકીય વિશ્લેષકો માને છે કે બાલેન શાહની આ રણનીતિ દેશમાં પારદર્શિતા લાવવા અને જૂના શાસનકાળના ભ્રષ્ટાચારને જડમૂળથી ઉખેડવાનો સંકેત છે.

નેપાળમાં છેલ્લા ત્રણ દિવસમાં ત્રણ મોટા મંત્રીઓને જેલના સળિયા પાછળ ધકેલી દેવામાં આવ્યા છે, જે દર્શાવે છે કે કાયદો હવે કોઈ પણ મોટા માથાને છોડવાના મૂડમાં નથી. દીપક ખડકા પહેલા ભૂતપૂર્વ વડાપ્રધાન કેપી શર્મા ઓલી અને પૂર્વ ગૃહ મંત્રી રમેશ લેખકની પણ ધરપકડ કરવામાં આવી છે, જેમના પર સપ્ટેમ્બર મહિનાના વિરોધ પ્રદર્શનને નિર્દયતાથી દબાવવાનો અને હિંસા ભડકાવવાનો આરોપ છે. ઉલ્લેખનીય છે કે આ ચળવળમાં 77 લોકોએ જીવ ગુમાવ્યા હતા અને દેશની અબજો રૂપિયાની સંપત્તિ ખાખ થઈ ગઈ હતી. હાલમાં કેપી શર્મા ઓલી હોસ્પિટલમાં સારવાર હેઠળ હોવાથી તેમને વર્ચ્યુઅલી કોર્ટમાં રજૂ કરવાની તૈયારી ચાલી રહી છે, જ્યારે આખું નેપાળ અત્યારે કોર્ટના સંભવિત ચુકાદાઓ પર મીટ માંડીને બેઠું છે.