ઈસ્લામાબાદ (ન્યૂઝફર્સ્ટ):
પાકિસ્તાનમાં સતત વકરી રહેલા ઉર્જા સંકટ અને આર્થિક કટોકટી વચ્ચે સરકારે આકરા પગલાં લેવાની જાહેરાત કરી છે. પાકિસ્તાન સરકાર દ્વારા દેશભરમાં ઉર્જા બચાવવા માટે સંપૂર્ણ અને વ્યાપક 'વીકેન્ડ લોકડાઉન' લાદવાનો નિર્ણય કરવામાં આવ્યો છે. આ લોકડાઉનનો મુખ્ય હેતુ વીજળી અને ઉર્જાના વપરાશમાં કાપ મૂકીને દેશની ડગમગતી અર્થવ્યવસ્થાને ટેકો આપવાનો છે. આગામી ૪ થી એપ્રિલ (શનિવાર) અને ૫ મી એપ્રિલ (રવિવાર) થી આ કડક નિયમોનો અમલ શરૂ કરવામાં આવશે.

તમામ વ્યાપારિક અને ઔદ્યોગિક પ્રવૃત્તિઓ પર રોક:
નવા નિયમો મુજબ, શનિવાર અને રવિવાર દરમિયાન દેશભરના તમામ બજારો અને વ્યાપારિક સંકુલ સંપૂર્ણપણે બંધ રહેશે. આ લોકડાઉન માત્ર બજારો પૂરતું સીમિત નહીં રહે, પરંતુ તમામ નાના-મોટા ઉદ્યોગો, સેવા ક્ષેત્રો અને વ્યવસાયિક પ્રવૃત્તિઓને પણ લાગુ પડશે. ઔદ્યોગિક એકમોને કામગીરી સ્થગિત રાખવાની સૂચના આપવામાં આવી છે જેથી ઉર્જાનો બચાવ કરી શકાય.

વાહનવ્યવહાર અને મુસાફરી પર પ્રતિબંધ:
વીકેન્ડ લોકડાઉન દરમિયાન પાકિસ્તાનના તમામ હાઈવે, રોડવેઝ અને મોટરવે પર દરેક પ્રકારના વાહનોની અવરજવર પર પ્રતિબંધ લાદવામાં આવ્યો છે. કોઈ પણ ખાનગી કે જાહેર વાહનો રસ્તા પર નીકળી શકશે નહીં. આ નિર્ણયનો હેતુ લોકોની અવરજવર ઘટાડીને ઈંધણ અને વીજળીનો વપરાશ ન્યૂનતમ કરવાનો છે. માત્ર ઈમરજન્સી સેવાઓને જ આ નિયમોમાં છૂટછાટ આપવામાં આવી શકે છે.

જાહેર સમારંભો અને ઉજવણીઓ પર પ્રતિબંધ:
સરકારે સ્પષ્ટ કર્યું છે કે સપ્તાહાંતના લોકડાઉન દરમિયાન કોઈ પણ સ્થળે લગ્ન પ્રસંગો કે અન્ય કોઈ પણ પ્રકારના સામાજિક અને વિજયી ઉત્સવોની ઉજવણી કરવાની પરવાનગી આપવામાં આવશે નહીં. જાહેર મેળાવડાઓ પરના આ પ્રતિબંધથી ઉર્જાની બચત સાથે કાયદો અને વ્યવસ્થા જાળવવામાં પણ મદદ મળશે તેવું તંત્રનું માનવું છે. ૪ થી એપ્રિલથી અમલી બનનારા આ આદેશોનું ઉલ્લંઘન કરનારાઓ સામે કડક કાર્યવાહી કરવાની પણ ચેતવણી આપવામાં આવી છે.