ઈસરો માર્ચ ૨૦૨૮માં શુક્રયાન-૧ લોન્ચ કરશે: ૧,૨૩૬ કરોડના ખર્ચે શુક્ર ગ્રહના વાતાવરણ અને સપાટીનો અભ્યાસ કરાશે

 

નવી દિલ્હી: ભારતીય અવકાશ સંશોધન સંસ્થા (ઈસરો) માર્ચ ૨૦૨૮માં પોતાનું પ્રથમ શુક્રયાન-૧ લોન્ચ કરવાની તૈયારી કરી રહી છે. કેન્દ્રીય કેબિનેટે આ ઐતિહાસિક વિનસ ઓર્બિટર મિશન માટે રૂપિયા ૧,૨૩૬ કરોડના બજેટને મંજૂરી આપી દીધી છે, જેમાંથી આશરે રૂપિયા ૮૨૪ કરોડ સ્પેસક્રાફ્ટના વિકાસ માટે ફાળવવામાં આવ્યા છે. લોન્ચ વ્હીકલ માર્ક-૩ (એલવીએમ-૩) રોકેટ મારફતે ૨૯ માર્ચ ૨૦૨૮ના રોજ પૃથ્વી પરથી રવાના થઈને આ યાન ૧૧૨ દિવસની સફર ખેડશે અને ૧૯ જુલાઈ ૨૦૨૮ના રોજ શુક્રની ભ્રમણકક્ષામાં પહોંચશે. 

 

પૃથ્વીની જેમ જ એક સમયે રહેવાલાયક મનાતા આ ગ્રહના વાતાવરણ, સપાટી, જ્વાળામુખીની ગતિવિધિઓ અને સૂર્ય સાથેની તેની ક્રિયા-પ્રતિક્રિયાનો ઊંડાણપૂર્વક અભ્યાસ કરવામાં આવશે. 

 

આ મિશનમાં પ્રથમ વખત એરોબ્રેકિંગ ટેકનોલોજીનો ઉપયોગ થશે, જેમાં યાનને શુક્રના વાતાવરણના ઘર્ષણથી ધીમું પાડીને યોગ્ય ભ્રમણકક્ષામાં સ્થાપિત કરવામાં આવશે. વર્ષ ૨૦૧૩ના મંગળયાન પછી ભારતનું આ બીજું આંતરગ્રહીય મિશન સ્પેસ સેક્ટરમાં દેશની વધતી જતી ક્ષમતાનું ઉત્કૃષ્ટ ઉદાહરણ પૂરું પાડશે.

 

 

_____

 

વેદાંત ગ્રુપ એપ્રિલ ૨૦૨૬માં પાંચ અલગ-અલગ લિસ્ટેડ કંપનીઓમાં વિભાજિત થશે: દેવું ઘટાડવા અને શેરધારકોનું મૂલ્ય વધારવા અનિલ અગ્રવાલની મેગા રિસ્ટ્રક્ચરિંગ યોજના

 

ભારતની અગ્રણી માઇનિંગ અને મેટલ્સ કંપની વેદાંત લિમિટેડ એપ્રિલ ૨૦૨૬ના પ્રથમ સપ્તાહમાં પાંચ સ્વતંત્ર લિસ્ટેડ કંપનીઓમાં વિભાજિત થવા જઈ રહી છે. કંપનીના ચેરમેન અનિલ અગ્રવાલે આ સમયરેખાની પુષ્ટિ કરતા જણાવ્યું છે કે આ ઐતિહાસિક ડીમર્જરથી શેરધારકોના મૂલ્યમાં ધરખમ વધારો થશે. નેશનલ કંપની લો ટ્રિબ્યુનલ (એનસીએલટી) અને અન્ય કાનૂની મંજૂરીઓ મળ્યા બાદ હવે આ પ્રક્રિયા અંતિમ તબક્કામાં છે. નવી રચના મુજબ વેદાંત એલ્યુમિનિયમ, વેદાંત ઓઇલ એન્ડ ગેસ (કેર્ન સહિત), વેદાંત પાવર, અને વેદાંત સ્ટીલ એન્ડ આયર્ન એમ નવી કંપનીઓ અસ્તિત્વમાં આવશે, જ્યારે મૂળ વેદાંત લિમિટેડ ઝિંક અને સિલ્વર બિઝનેસ સંભાળશે. વર્તમાનમાં ૧૧ બિલિયન ડોલરનું દેવું ધરાવતા વેદાંત ગ્રુપને આ વિભાજન બાદ દેવાનું ભારણ ૭ બિલિયન ડોલર આસપાસ લાવી શકાશે તેવી આશા છે. વર્તમાન શેરધારકોને વેદાંત લિમિટેડના પ્રત્યેક શેર દીઠ નવી કંપનીઓના શેર ફાળવવામાં આવશે અને તમામ કંપનીઓ ૧૫ મે ૨૦૨૬ સુધીમાં શેરબજારમાં લિસ્ટેડ થઈ જશે.*l

 

____

 

નોઈડા ઇન્ટરનેશનલ એરપોર્ટ પરથી આગામી ૪૫-૬૦ દિવસમાં કોમર્શિયલ ફ્લાઇટ્સ શરૂ થશે: કેન્દ્રીય ઉડ્ડયન મંત્રી રામ મોહન નાયડુની જાહેરાત, શરૂઆતમાં ૧૦ શહેરોને જોડવામાં આવશે

 

વડાપ્રધાન નરેન્દ્રભાઈ મોદી દ્વારા શનિવારે જેવર ખાતે નોઈડા ઇન્ટરનેશનલ એરપોર્ટના પ્રથમ તબક્કાનું ઉદ્ઘાટન કરવામાં આવ્યા બાદ નાગરિક ઉડ્ડયન મંત્રી કે. રામ મોહન નાયડુએ મોટી જાહેરાત કરી છે. તેમણે જણાવ્યું કે આગામી ૪૫ થી ૬૦ દિવસમાં આ નવા એરપોર્ટ પરથી કોમર્શિયલ પેસેન્જર અને કાર્ગો ફ્લાઇટ્સની નિયમિત કામગીરી શરૂ કરી દેવામાં આવશે. એરપોર્ટને તાજેતરમાં જ તેનું એરોડ્રોમ લાયસન્સ પ્રાપ્ત થયું છે. 

 

શરૂઆતના તબક્કામાં માત્ર સ્થાનિક ફ્લાઇટ્સ ચલાવવામાં આવશે જે ૧૦ મોટા શહેરોને જોડશે અને ત્યારબાદ ધીમે-ધીમે ૬૦ થી ૬૫ શહેરો માટે સેવાઓ વિસ્તૃત કરાશે. ઇન્ડિગો અને આકાસા એર જેવી એરલાઇન્સે અહીંથી ઉડાન ભરવા અને એમઆરઓ (મેન્ટેનન્સ, રિપેર અને ઓવરહોલ) સુવિધાઓ સ્થાપવા માટે સમજૂતી કરી છે. 

 

રૂપિયા ૧૧,૨૦૦ કરોડના જંગી રોકાણથી નિર્માણ પામેલ આ એરપોર્ટ શરૂઆતમાં વાર્ષિક ૧ કરોડ ૨૦ લાખ મુસાફરોને હેન્ડલ કરવાની ક્ષમતા ધરાવે છે અને સંપૂર્ણ વિકાસ બાદ ૭ કરોડ મુસાફરોને સેવા પૂરી પાડશે.*

 

 

_____

 

 

*સરહદી સુરક્ષા વધારવા ઈસરો આગામી ત્રણ વર્ષમાં ૧૦૦ થી ૧૫૦ નવા ઉપગ્રહો લોન્ચ કરશે: ખાનગી કંપનીઓની મદદથી કોસ્ટલ સર્વેલન્સ અને આંતરરાષ્ટ્રીય સીમાઓ પર ચાંપતી નજર રખાશે: અત્યારે ભારત પાસે માત્ર ૫૫ જેટલા કાર્યરત ઉપગ્રહો છે

 

બેંગલુરુ: દેશની વિશાળ જમીની સરહદો અને લાંબા દરિયાકાંઠાની સુરક્ષાને વધુ સઘન બનાવવા માટે ભારતીય અવકાશ સંશોધન સંસ્થા (ઈસરો) એક મોટો પ્રોજેક્ટ હાથ ધરવા જઈ રહી છે. ઈસરોના અધ્યક્ષ વી. નારાયણને ચેન્નઈમાં યોજાયેલા એક કાર્યક્રમમાં જાહેરાત કરી હતી કે આગામી ત્રણ વર્ષમાં ૧૦૦ થી ૧૫૦ જેટલા નવા સેટેલાઇટ અંતરિક્ષમાં પ્રક્ષેપિત કરવામાં આવશે. અત્યારે ભારત પાસે માત્ર ૫૫ જેટલા કાર્યરત ઉપગ્રહો છે, જે ૭,૫૦૦ કિલોમીટર લાંબા દરિયાકાંઠા અને સંવેદનશીલ સરહદોની સંપૂર્ણ દેખરેખ માટે અપૂરતા છે. 

 

કેન્દ્ર સરકારે સ્પેસ સેક્ટરમાં કરેલા સુધારાઓને પગલે આ નવા ઉપગ્રહોના નિર્માણમાં ખાનગી કંપનીઓની પણ મદદ લેવામાં આવશે. તાજેતરમાં કાશ્મીરના પહેલગામમાં થયેલા આતંકવાદી હુમલાના સંદર્ભમાં તેમણે આ માહિતી આપી હતી. 

 

આ ઉપરાંત, ઈસરોએ પોતાની સ્પેડેક્સ (સ્પેસ ડોકિંગ એક્સપેરિમેન્ટ) સિદ્ધિનો ઉલ્લેખ કરતા જણાવ્યું કે જાન્યુઆરી અને માર્ચ વચ્ચે બે ઉપગ્રહોનું સફળ ડોકિંગ અને અનડોકિંગ પણ કરવામાં આવ્યું છે.*