કોલકાતા:  પશ્ચિમ બંગાળ વિધાનસભાની આગામી ચૂંટણીઓ માટે કોંગ્રેસે રવિવારે પોતાની સૌથી મોટી અને નિર્ણાયક યાદી જાહેર કરી દીધી છે. કુલ 294 બેઠકોમાંથી 284 બેઠકો પર ઉમેદવારોના નામ જાહેર કરીને કોંગ્રેસે સ્પષ્ટ કર્યું છે કે તેઓ આ વખતે કોઈપણ બાંધછોડ કરવાના મૂડમાં નથી. આ યાદીમાં સૌથી મોટું નામ પૂર્વ પ્રદેશ પ્રમુખ અધીર રંજન ચૌધરીનું છે, જેમને તેમના ગઢ ગણાતા બહેરામપુરથી ટિકિટ આપવામાં આવી છે. આ સિવાય મૌસમ નૂર જેવા પ્રભાવશાળી નેતાને માલતીપુરથી મેદાનમાં ઉતારીને કોંગ્રેસે મુસ્લિમ બહુલ વિસ્તારોમાં પોતાની પકડ મજબૂત કરવાનો પ્રયાસ કર્યો છે.

 ચૂંટણી પંચના આદેશ મુજબ, બંગાળની સત્તાનો તાજ કોના શિરે જશે તેનો નિર્ણય બે મહત્ત્વના તબક્કાઓમાં થશે. પ્રથમ તબક્કાનું મતદાન 23 એપ્રિલે 152 બેઠકો પર યોજાશે, જેમાં રાજ્યના પૂર્વી અને ઉત્તરી ભાગોમાં ભારે રસાકસી જોવા મળી શકે છે. ત્યારબાદ, 29 એપ્રિલે બાકીની 142 બેઠકો પર બીજા તબક્કાનું મતદાન થશે. આ બંને તબક્કાઓનું પરિણામ 4 મેના રોજ જાહેર થશે, જે નક્કી કરશે કે શું કોંગ્રેસ-ડાબેરી મોરચો મમતા બેનર્જી કે ભાજપના વિજય રથને રોકવામાં સફળ થાય છે કે નહીં.

 આ વખતે બંગાળની ચૂંટણી માત્ર સત્તા મેળવવા માટેની લડાઈ નથી, પરંતુ પક્ષોના અસ્તિત્વનો સવાલ બની ગઈ છે. એક તરફ તૃણમૂલ કોંગ્રેસ પોતાનો ગઢ બચાવવા મથી રહી છે, બીજી તરફ ભાજપ આક્રમક પ્રચાર કરી રહ્યું છે, ત્યારે કોંગ્રેસે આટલી મોટી સંખ્યામાં ઉમેદવારો ઉતારીને ચૂંટણીને 'ત્રિપાંખિયા જંગ'માં ફેરવી દીધી છે. રાજકીય નિષ્ણાતો માને છે કે અધીર રંજન જેવા દિગ્ગજોના મેદાનમાં આવવાથી કોંગ્રેસના કેડરમાં નવો ઉત્સાહ આવશે, જે રાજ્યના મતોના ધ્રુવીકરણને અસર કરી શકે છે. હવે જોવાનું એ રહેશે કે 4 મેના રોજ બંગાળની જનતા કોના પર કળશ ઢોળે છે.