નવી દિલ્હી:દેશમાં એનર્જી સપ્લાય પર વધી રહેલા દબાણને ધ્યાનમાં રાખીને કેન્દ્ર સરકાર દ્વારા કેરોસીનના વિતરણ અને સંગ્રહ અંગે એક મહત્વપૂર્ણ નિર્ણય લેવામાં આવ્યો છે. પેટ્રોલિયમ અને પ્રાકૃતિક ગેસ મંત્રાલય દ્વારા જારી કરવામાં આવેલા નવા નોટિફિકેશન મુજબ, હવે જાહેર ક્ષેત્રની ઓઇલ માર્કેટિંગ કંપનીઓ (PSUs) ને તેમના પેટ્રોલ પંપ પર કેરોસીન સંગ્રહ કરવાની મંજૂરી આપવામાં આવી છે. આ નિર્ણયનો હેતુ ખાસ કરીને એવા વિસ્તારોમાં ઇંધણની સપ્લાય સરળ બનાવવાનો છે જ્યાં પીડીએસ (PDS) હેઠળ નિયમિત પુરવઠો મળતો ન હતો.

૨૫૦૦ લિટર સુધીના સંગ્રહની છૂટ:
પેટ્રોલિયમ રૂલ્સ ૨૦૦૨ હેઠળ આપવામાં આવેલી આ છૂટછાટ મુજબ, 'ફોર્મ XIV' લાયસન્સ ધરાવતા સર્વિસ સ્ટેશનો હવે એક શેડની અંદર ૨૫૦૦ લિટર સુધી કેરોસીન રાખી શકશે. જોકે, શરત એ રાખવામાં આવી છે કે એક સર્વિસ સ્ટેશન પર કુલ સંગ્રહ ક્ષમતા ૫૦૦૦ લિટરથી વધુ ન હોવી જોઈએ. આ વ્યવસ્થાથી પેટ્રોલ પંપ હવે માત્ર પેટ્રોલ-ડીઝલ જ નહીં પરંતુ કેરોસીનના નાના સ્ટોરેજ સેન્ટર તરીકે પણ કાર્યરત થશે.

ગુજરાત સહિત ૨૧ રાજ્યોને મળશે લાભ:
આ નવો નિયમ દેશના ૨૧ રાજ્યો અને કેન્દ્રશાસિત પ્રદેશોમાં લાગુ કરવામાં આવ્યો છે. જેમાં ગુજરાત, દિલ્હી, ઉત્તર પ્રદેશ, રાજસ્થાન, મધ્ય પ્રદેશ અને હિમાચલ પ્રદેશ જેવા મોટા રાજ્યોનો સમાવેશ થાય છે. સરકારના આ નિર્ણયથી એવા લોકોને મોટી રાહત મળશે જેઓ આજે પણ રસોઈ બનાવવા અને રોશની માટે કેરોસીન પર નિર્ભર છે. વધુમાં, કેરોસીન ડીલરોને 'ફોર્મ XVIII' લાયસન્સમાંથી મુક્તિ આપવામાં આવી છે જેથી તેઓ સીધા જ પેટ્રોલ પંપ પરથી વિતરણ કરી શકે.

વૈશ્વિક પરિસ્થિતિ અને કડક શરતો:
નોટિફિકેશનમાં સ્પષ્ટતા કરવામાં આવી છે કે વર્તમાન વૈશ્વિક ભૌગોલિક પરિસ્થિતિઓને કારણે ઉર્જા પુરવઠા પર અસર પડી હોવાથી આ એક પ્રકારનો 'ઇમરજન્સી રિસ્પોન્સ' છે. જોકે, આ સુવિધાનો ઉપયોગ માત્ર રસોઈ અને પ્રકાશ માટે જ કરી શકાશે, તેનો વ્યાપારી ઉપયોગ પ્રતિબંધિત છે. તમામ સુરક્ષા ધોરણોનું પાલન અને સંગ્રહનો સંપૂર્ણ રેકોર્ડ રાખવો ફરજિયાત રહેશે. આ વ્યવસ્થા હાલ પૂરતી કામચલાઉ છે અને નોટિફિકેશનના ૬૦ દિવસ સુધી અથવા આગામી આદેશ સુધી અમલી રહેશે.