પાકિસ્તાનની રાષ્ટ્રીય એરલાઇન હાલમાં તેના ઈતિહાસના સૌથી ભયાનક નાણાકીય સંકટમાંથી પસાર થઈ રહી છે. પાડોશી દેશની આર્થિક સ્થિતિ એટલી હદે વણસી ગઈ છે કે હવે સરકારી એરલાઇન સંપૂર્ણપણે ઠપ્પ થઈ જવાની ભીતિ સેવાઈ રહી છે. આ ગંભીર પરિસ્થિતિને કારણે હજારો સામાન્ય મુસાફરોના આયોજન ખોરવાઈ શકે તેમ છે.

છેલ્લા કેટલાક સપ્તાહમાં એવિએશન ફ્યુઅલ એટલે કે જેટ ઇંધણના ભાવમાં 150 ટકા જેટલો અકલ્પનીય ઉછાળો જોવા મળ્યો છે. સરકારે આ ભાવવધારો કોઈ પણ સત્તાવાર જાહેરાત વિના જ લાગુ કરી દીધો છે.સરકારી આંકડાઓ મુજબ, 1 માર્ચે જે ઇંધણ (JP-1 Fuel) પ્રતિ લિટર 190 રૂપિયા હતું, તે 21 માર્ચ સુધીમાં વધીને 472 રૂપિયા પર પહોંચી ગયું છે. ફક્ત એક જ દિવસમાં 84 રૂપિયાનો તોતિંગ વધારો ઝીંકવામાં આવતા હવાઈ મુસાફરી હવે સામાન્ય માણસ માટે સ્વપ્ન સમાન બની ગઈ છે.

આ નાણાકીય કટોકટી વચ્ચે PIA કન્સોર્ટિયમના ચેરમેન આરિફ હબીબે ચોંકાવનારી વિગતો શેર કરી છે. તેમણે એક ન્યૂઝ ચેનલ સાથેની વાતચીતમાં સ્પષ્ટ કર્યું કે, જો જેટ ઇંધણના ભાવ આ જ રીતે વધતા રહેશે, તો એરલાઇનનું સંચાલન કરવું અશક્ય બની જશે. તેમણે ચેતવણી આપી છે કે જો આર્થિક મદદ નહીં મળે તો ટૂંક સમયમાં જ PIA ને કાયમી તાળાં મારવાની ફરજ પડી શકે છે.

વૈશ્વિક સ્તરે ચાલી રહેલા યુએસ અને ઈરાન વચ્ચેના તણાવ (US-Iran Conflict) ને કારણે આંતરરાષ્ટ્રીય સપ્લાય ચેઈન ખોરવાઈ ગઈ છે. આ યુદ્ધ જેવી સ્થિતિને કારણે તેલના પુરવઠામાં વિક્ષેપ પડ્યો છે, જેની સીધી અસર પાકિસ્તાન જેવા દેશો પર પડી રહી છે.