ઓકલેન્ડ, તા.30: જો તમે કોઈ ખાસ પ્રોજેક્ટ, બિઝનેસ ઇવેન્ટ કે ટૂંકા ગાળાના વર્ક અસાઇનમેન્ટ માટે ન્યુઝીલેન્ડ જવાનું વિચારી રહ્યા હોવ, તો ન્યુઝીલેન્ડનો 'સ્પેસિફિક પર્પઝ વર્ક વિઝા' (Specific Purpose Work Visa) તમારા માટે શ્રેષ્ઠ વિકલ્પ બની શકે છે. આ વિઝા ખાસ કરીને એવા લોકો માટે છે જેમને ન્યુઝીલેન્ડમાં કોઈ નિર્ધારિત કાર્ય પૂર્ણ કરવા માટે જવું છે.
કોણ કરી શકે છે અરજી?
આ વિઝા શ્રેણીમાં વ્યવસાયિક મુલાકાતીઓ, નિષ્ણાત ટેકનિશિયનો (જેમ કે કોઈ મશીનરી ઇન્સ્ટોલ કરવા જવું હોય), સ્પોર્ટ્સ પ્રોફેશનલ્સ, રેફરી, પરીક્ષકો અને બહુરાષ્ટ્રીય કંપનીઓના કર્મચારીઓ કે જેઓ ટ્રાન્સફર થઈને ન્યુઝીલેન્ડ જઈ રહ્યા હોય તેમનો સમાવેશ થાય છે. જોકે, મનોરંજન ક્ષેત્રના કલાકારો કે ટૂર ગાઇડ્સ માટે અલગ વિઝાની જોગવાઈ છે.
જરૂરી દસ્તાવેજો અને ખર્ચ
અરજદારે ન્યુઝીલેન્ડ જવા પાછળનો પોતાનો ચોક્કસ હેતુ સાબિત કરવો પડશે. આ માટે જોબ ઓફર લેટર, ઇન્વિટેશન લેટર અથવા ઇવેન્ટનું શેડ્યૂલ રજૂ કરવું અનિવાર્ય છે. આ વિઝાની અરજી ફી આશરે NZ $1,455 (અંદાજે ₹75,000) થી શરૂ થાય છે. મોટાભાગની અરજીઓનો નિકાલ માત્ર ચાર અઠવાડિયાની અંદર કરી દેવામાં આવે છે, જે તેને ઝડપી પ્રક્રિયા બનાવે છે.
આરોગ્ય અને ચારિત્ર્યની કસોટી
મુસાફરીના સમયગાળા અને તમે કયા દેશમાંથી આવો છો તેના આધારે, તમારે મેડિકલ સર્ટિફિકેટ, ચેસ્ટ એક્સ-રે કે પોલીસ ક્લિયરન્સ સર્ટિફિકેટ (PCC) આપવું પડી શકે છે. આ ઉપરાંત, તમારે એ પણ સાબિત કરવું પડશે કે તમારી પાસે ત્યાં રહેવા માટે પૂરતું ભંડોળ છે અથવા તમારો કોઈ પ્રાયોજક (Sponsor) છે. સૌથી મહત્વની શરત એ છે કે કામ પૂર્ણ થયા બાદ તમારે ન્યુઝીલેન્ડ છોડવાનો ઇરાદો સ્પષ્ટ કરવો પડશે, જેના માટે રિટર્ન ટિકિટના પુરાવા જરૂરી છે.
કામ કરવાની શરતો અને એક્સટેન્શન
એકવાર વિઝા મળી ગયા પછી, તમે માત્ર એ જ નોકરી કે પ્રોજેક્ટ પર કામ કરી શકશો જેનો ઉલ્લેખ વિઝામાં કરાયો છે. જો તમે કોઈ મોટી કંપનીમાં કામ કરતા હોવ, તો આ વિઝાને ત્રણ વર્ષ સુધી લંબાવી શકાય છે, જ્યારે અન્ય નિષ્ણાતો માટે 12 મહિનાના એક્સટેન્શનની જોગવાઈ છે.