નવી દિલ્હી, તા.30: જો તમે અમેરિકા જવા માટે વિઝાની રાહ જોઈ રહ્યા હોવ, તો તમારા માટે એક મહત્વના સમાચાર છે. યુએસ ડિપાર્ટમેન્ટ ઓફ સ્ટેટ દ્વારા જાહેર કરવામાં આવેલા તાજેતરના આંકડા મુજબ, ભારતના અલગ-અલગ શહેરોમાં વિઝા ઇન્ટરવ્યૂ માટેના વેઇટિંગ પીરિયડમાં મોટો તફાવત જોવા મળ્યો છે. ખાસ કરીને પર્યટન અને બિઝનેસ (B1/B2) વિઝા માટે હજુ પણ કેટલાક શહેરોમાં મહિનાઓ સુધી રાહ જોવી પડી રહી છે.
કયા શહેરમાં કેટલી રાહ?
તાજા અહેવાલ મુજબ, મુંબઈમાં વિઝિટર વિઝા માટે સૌથી વધુ એટલે કે 9 મહિના સુધીની રાહ જોવી પડી શકે છે. તેની સરખામણીએ નવી દિલ્હીમાં આ સમયગાળો 7 મહિના અને હૈદરાબાદમાં 8 મહિના જેટલો છે. જોકે, રાહતના સમાચાર એ છે કે ચેન્નાઈમાં વિઝિટર વિઝા માટેનો રાહ જોવાનો સમય અન્ય શહેરોની સરખામણીએ ઘણો ઓછો એટલે કે આશરે 3.5 મહિના જેટલો જ છે. આ તફાવતને કારણે અરજદારો હવે વહેલી એપોઇન્ટમેન્ટ મેળવવા માટે અન્ય શહેરના કોન્સ્યુલેટનો વિકલ્પ પણ વિચારી રહ્યા છે.
વિદ્યાર્થીઓ અને પ્રોફેશનલ્સ માટે સારા સમાચાર
વિઝિટર વિઝામાં ભલે વિલંબ હોય, પરંતુ વિદ્યાર્થી (F, M, J) અને વર્ક વિઝા (H, L, O, P, Q) શ્રેણીમાં કામગીરી ખૂબ જ ઝડપથી ચાલી રહી છે.
•    નવી દિલ્હી: વિદ્યાર્થી વિઝા માટે માત્ર 15 દિવસથી પણ ઓછો સમય.
•    મુંબઈ: વર્ક વિઝા માટે માત્ર 1 મહિનાની રાહ.
•    કોલકાતા: વર્ક વિઝા માટે 1.5 મહિનાનો સમય.
ક્રૂ અને ટ્રાન્ઝિટ વિઝાની પ્રક્રિયા તો લગભગ તમામ શહેરોમાં એક મહિનાની અંદર પૂર્ણ થઈ રહી છે.
એપોઇન્ટમેન્ટ સ્લોટ પર રાખવી નજર
યુએસ ડિપાર્ટમેન્ટ ઓફ સ્ટેટે સ્પષ્ટતા કરી છે કે આ વેઇટિંગ પીરિયડ અંદાજિત છે અને તે ગમે ત્યારે બદલાઈ શકે છે. ઘણીવાર દૂતાવાસો દ્વારા અચાનક નવા સ્લોટ ખોલવામાં આવે છે, જેનાથી અરજદારો પોતાની એપોઇન્ટમેન્ટ વહેલી રિ-શેડ્યૂલ કરી શકે છે. નિષ્ણાતો સલાહ આપે છે કે અરજદારોએ સત્તાવાર વેબસાઈટ પર સતત નજર રાખવી જોઈએ જેથી કોઈ અગાઉનો સ્લોટ ખાલી પડે તો તેનો લાભ લઈ શકાય.
 
ભારતમાં US વિઝા વેઇટિંગ પીરિયડ (માર્ચ 2026)
શહેર    વિઝિટર વિઝા (B1/B2)    વિદ્યાર્થી વિઝા (F,M,J)    વર્ક વિઝા (H,L,O,P,Q)
મુંબઈ    9 મહિના    2 મહિના    1 મહિનો
નવી દિલ્હી    7 મહિના    < 0.5 મહિનો    1 મહિનો
હૈદરાબાદ    8 મહિના    2.5 મહિના    3 મહિના
ચેન્નાઈ    3.5 મહિના    NA    NA
કોલકાતા    6.5 મહિના    2.5 મહિના    1.5 મહિના