મેલબોર્ન, તા.30: દુનિયાભરમાં ચાલી રહેલા યુદ્ધ અને મધ્ય-પૂર્વના દેશોમાં તણાવની સીધી અસર હવે ઓસ્ટ્રેલિયાના સામાન્ય નાગરિકોના ખિસ્સા પર પડી રહી છે. ઈંધણના આસમાને પહોંચેલા ભાવ અને વધતી જતી મોંઘવારી વચ્ચે ઓસ્ટ્રેલિયાની સરકારે એક મોટો અને રાહત આપનારો નિર્ણય લીધો છે. દેશના બે મોટા રાજ્યો—વિક્ટોરિયા અને તાસ્માનિયામાં—હવે મુસાફરોએ જાહેર પરિવહન માટે એક પણ રૂપિયો (ડોલર) ચૂકવવો પડશે નહીં.
ક્યાં અને ક્યારથી મળશે આ લાભ?
રાજ્ય સરકારો દ્વારા કરવામાં આવેલી સત્તાવાર જાહેરાત મુજબ:
•    વિક્ટોરિયા: અહીંના રહેવાસીઓ 31 માર્ચથી સતત એક મહિના સુધી ટ્રેન અને બસમાં મફત મુસાફરી કરી શકશે.
•    તાસ્માનિયા: અહીં પ્રજાને લાંબી રાહત આપવામાં આવી છે. 30 માર્ચથી 1 જુલાઈ સુધી તમામ બસો અને ફેરી સર્વિસના ભાડા સંપૂર્ણપણે માફ કરી દેવામાં આવ્યા છે.
ઈંધણની તીવ્ર અછત અને વધતો ફુગાવો
ઓસ્ટ્રેલિયામાં અત્યારે અનેક સર્વિસ સ્ટેશનો પર ઈંધણની અછત જોવા મળી રહી છે. ખેતી અને ખાણકામ જેવા મહત્વના ક્ષેત્રોમાં ડિલિવરી ખોરવાઈ છે. ઈંધણ મોંઘું થતા ફુગાવો વધ્યો છે, જેને નિયંત્રિત કરવા માટે સેન્ટ્રલ બેંક (RBA) એ વ્યાજ દરો વધારીને 4.1% કરી દીધા છે. હજુ પણ વ્યાજ દરો વધવાની શક્યતા જોતા, લોકો પરનો આર્થિક બોજ ઘટાડવા સરકારે મફત મુસાફરીનું શસ્ત્ર ઉગામ્યું છે.
વડાપ્રધાનની 'ફ્યુઅલ સિક્યોરિટી' યોજના
વડાપ્રધાન એન્થોની અલ્બેનીઝે નાગરિકોને ખાતરી આપી છે કે ટૂંકા ગાળામાં ઈંધણનો પુરવઠો સ્થિર થઈ જશે. સરકારે આંતરરાષ્ટ્રીય બજારોમાંથી ખાનગી ક્ષેત્ર દ્વારા ઈંધણ ખરીદવાની પ્રક્રિયાને વેગ આપવા માટે નવા કાયદા બનાવવાની તૈયારી કરી છે, જેનો પ્રસ્તાવ સોમવારે સંસદમાં રજૂ કરવામાં આવશે. સરકારનો ઉદ્દેશ્ય માત્ર જનતાને રાહત આપવાનો જ નથી, પરંતુ દેશની ઈંધણ સુરક્ષાને પણ મજબૂત કરવાનો છે.