વોશિંગ્ટન, તા.30: અમેરિકામાં ટ્રમ્પ વહીવટીતંત્ર દ્વારા લેવામાં આવી રહેલા કડક ઇમિગ્રેશન પગલાં હવે વિવાદના વમળમાં ફસાયા છે. ભારતીય મૂળના કોંગ્રેસવુમન પ્રમિલા જયપાલે ૨૭ માર્ચના રોજ એક ખાસ 'શેડો હિયરિંગ' (Shadow Hearing) યોજીને યુએસ ઇમિગ્રેશન એન્ડ કસ્ટમ્સ એન્ફોર્સમેન્ટ (ICE) પર સનસનાટીભર્યા આક્ષેપો કર્યા છે. જયપાલના જણાવ્યા અનુસાર, સરકારની આ નીતિઓ માસૂમ બાળકોને માનસિક આઘાત પહોંચાડી રહી છે અને પરિવારોને વિખેરી રહી છે.
દરરોજ સરેરાશ 50 બાળકો બને છે અનાથ!
ઇમિગ્રેશન સબકમિટીના રેન્કિંગ સભ્ય પ્રમિલા જયપાલે આંકડાકીય વિગતો આપતા જણાવ્યું કે, ડોનાલ્ડ ટ્રમ્પના કાર્યકાળના માત્ર પહેલા સાત મહિનામાં જ ૧૧,૦૦૦ થી વધુ અમેરિકી નાગરિક બાળકોના માતા-પિતાની અટકાયત કરવામાં આવી છે. આનો અર્થ એ થાય કે દરરોજ સરેરાશ ૫૦ બાળકોએ તેમના માતા કે પિતાને જેલના સળિયા પાછળ જતા જોવા પડે છે. જયપાલે આક્ષેપ કર્યો કે ICE ઘણીવાર બાળકોની નજર સામે જ માતા-પિતાની ધરપકડ કરવા માટે હિંસાનો ઉપયોગ કરે છે.
5 વર્ષના લિયામ રામોસનો હૃદયદ્રાવક કિસ્સો
સુનાવણી દરમિયાન ૫ વર્ષના લિયામ રામોસના કેસનો ઉલ્લેખ કરવામાં આવ્યો હતો, જેણે સૌને હચમચાવી દીધા હતા. મિનેપોલિસમાં ૨૦ જાન્યુઆરીના રોજ આ માસૂમ બાળક જ્યારે પ્રિસ્કુલથી ઘરે આવ્યો, ત્યારે ICE અધિકારીઓએ તેની અટકાયત કરી હતી. નિષ્ણાતોના મતે, બાળકોનો ઉપયોગ 'પ્રલોભન' અથવા રાજકીય 'પ્યાદા' તરીકે કરવો એ માનવ અધિકારોનું ઘોર ઉલ્લંઘન છે.
શું છે 'પ્રોજેક્ટ 2025' નો ખતરો?
નેશનલ સેન્ટર ફોર યુથ લો ના નેહા દેસાઈએ જણાવ્યું કે આ તમામ કાર્યવાહીઓ 'પ્રોજેક્ટ 2025' નો એક ભાગ છે. આ ૯૦૦ પાનાની નીતિ યાદી રાષ્ટ્રપતિની સત્તા વધારવા અને કટ્ટરપંથી સામાજિક દ્રષ્ટિકોણ લાદવા માટે તૈયાર કરવામાં આવી છે. જોકે, રાષ્ટ્રપતિ ટ્રમ્પે ચૂંટણી પ્રચાર દરમિયાન આ પ્રોજેક્ટથી પોતાને દૂર રાખ્યા હતા, પરંતુ વિપક્ષી નેતાઓ માને છે કે આ જ એજન્ડા પર કામ થઈ રહ્યું છે.
સાંસદોનો એકસૂરે વિરોધ
આ છાયા સુનાવણીમાં જયપાલ સાથે જોઆક્વિન કાસ્ટ્રો, જુડી ચુ અને ગ્લેન આઇવે સહિતના અનેક પ્રભાવશાળી સાંસદો જોડાયા હતા. ઇમિગ્રન્ટ ડિફેન્ડર્સ લો સેન્ટરના ડિરેક્ટરે સ્પષ્ટ શબ્દોમાં કહ્યું કે, "આ બાળકો છે, આક્રમણકારો નથી. તેઓ સુરક્ષાના હકદાર છે, દેશનિકાલના નહીં." જયપાલ દ્વારા આ શ્રેણીની આ સાતમી સુનાવણી હતી, જેનો મુખ્ય હેતુ ટ્રમ્પ સરકારની ઇમિગ્રેશન દેખરેખમાં થતી ખામીઓને ઉજાગર કરવાનો છે.