મિલવૌકી, તા.30: અમેરિકાના વિસ્કોન્સિન રાજ્યમાં રિપબ્લિકન પાર્ટીની અંદર એક મોટો આંતરિક વિખવાદ સપાટી પર આવ્યો છે. મિલવૌકી કાઉન્ટી રિપબ્લિકન પાર્ટીના ભૂતપૂર્વ સેક્રેટરી અને કોંગ્રેસના ઉમેદવાર પૂર્ણિમા નાથે પક્ષના 'MAGA' (Make America Great Again) જૂથ અને તેમની નીતિઓ સામે ખુલ્લેઆમ બળવો પોકાર્યો છે. ૨૮ માર્ચના રોજ યોજાયેલા એક કોકસ દરમિયાન તેમણે આપેલા ભાષણે સમગ્ર અમેરિકી રાજકારણમાં ચર્ચા જગાવી છે.
"હું આક્રમણખોર નથી, હું અમેરિકન વાર્તાનો ભાગ છું"
તાજેતરમાં જ પક્ષમાંથી હાંકી કાઢવામાં આવેલા પૂર્ણિમા નાથે પોતાની ઓળખ સ્પષ્ટ કરતા ગર્વ સાથે કહ્યું, "હું તમારી સામે એક ગૌરવપૂર્ણ રિપબ્લિકન તરીકે ઉભી છું, પરંતુ એવા પ્રકારની નહીં જેવી MAGA જૂથ ઈચ્છે છે. હું હિન્દુ છું, ખ્રિસ્તી નથી. હું ભૂરી (Brown) છું, ગોરી કે કાળી નથી. હું એક કાયદેસરની ઇમિગ્રન્ટ છું, કોઈ આક્રમણખોર નથી." તેમણે ઉમેર્યું કે તેમના જેવા લોકો કોઈની નોકરી ચોરવા નથી આવ્યા, પરંતુ દેશના ઘડતરમાં દરરોજ યોગદાન આપે છે.
પક્ષની અંદર જ ભેદભાવનો આરોપ
પૂર્ણિમા નાથે ગંભીર આક્ષેપ કર્યો હતો કે રિપબ્લિકન પાર્ટીની અંદર પણ કેટલાક લોકો તેમના જેવા ભારતીય મૂળના લોકોને 'ભારત પાછા જાઓ' તેવું કહે છે. તેમણે 'અમેરિકા ફર્સ્ટ' (America First) ના નારા પર પ્રશ્ન ઉઠાવતા પૂછ્યું કે શું આ સૂત્ર નેતૃત્વ માટે છે કે પછી બીજાના ભોગે પ્રભુત્વ મેળવવા અને લોકોને બાકાત રાખવા માટે છે? તેમણે સ્પષ્ટ કર્યું કે તેમની વફાદારી કોઈ સંપ્રદાય કે વ્યક્તિ પ્રત્યે નહીં, પરંતુ બંધારણીય સિદ્ધાંતો પ્રત્યે છે.
DEI અને શ્વેત સર્વોપરિતા સામે વાંધો
પોતાના આક્રમક પ્રવચનમાં નાથે ઓળખ-આધારિત લેબલ્સની પણ ટીકા કરી હતી. તેમણે કહ્યું, "મને કોઈ DEI (Diversity, Equity, and Inclusion) લેબલ અથવા શ્વેત ખ્રિસ્તી સર્વોપરિતાના સાંકડા બોક્સમાં ન મૂકો. આ સ્વતંત્રતા નથી, પરંતુ ભેદભાવ છે." તેમણે આત્મસાતીકરણ (Assimilation) ના વિચારને પડકારતા પૂછ્યું કે શું સંબંધ બાંધવા કે સ્વીકાર્ય બનવા માટે તેમણે પોતાની સંસ્કૃતિ અને વિશ્વાસને ભૂંસી નાખવો જોઈએ?
ચૂંટણી જંગમાં મક્કમ નિર્ધાર
નોંધનીય છે કે પૂર્ણિમા નાથ વિસ્કોન્સિનના ચોથા જિલ્લામાંથી યુએસ હાઉસ ઓફ રિપ્રેઝન્ટેટિવ્સ માટે ચૂંટણી લડી રહ્યા છે. તેઓ અગાઉ પણ અનેક હોદ્દાઓ માટે ચૂંટણી લડી ચૂક્યા છે અને ૨૦૨૪ના રિપબ્લિકન નેશનલ કન્વેન્શનમાં વૈકલ્પિક પ્રતિનિધિ તરીકે પણ સેવા આપી હતી. પક્ષમાંથી હકાલપટ્ટી છતાં, તેઓ દેશની સેવા કરવા માટે મક્કમ છે અને ભારતીય ઇમિગ્રન્ટ્સના અવાજને બુલંદ કરી રહ્યા છે.