પુડુચેરી : આગામી વિધાનસભા ચૂંટણીઓને ધ્યાનમાં રાખીને વડાપ્રધાન નરેન્દ્ર મોદીએ આજે પુડુચેરીના ભાજપ કાર્યકરો સાથે સીધો સંવાદ સાધ્યો હતો. 'મેરા બૂથ, સબસે મઝબૂત' અભિયાન હેઠળ વર્ચ્યુઅલી સંબોધન કરતા પીએમ મોદીએ કોંગ્રેસ અને ડીએમકે (DMK) ના ગઠબંધન પર આકરા પ્રહારો કર્યા હતા. તેમણે સ્પષ્ટ શબ્દોમાં જણાવ્યું હતું કે પુડુચેરીની સમજદાર જનતા આ વખતે પરિવારવાદી રાજનીતિ કરનારાઓને સત્તાની નજીક પણ ફરકવા દેશે નહીં.
પરિવારવાદ વિરુદ્ધ રાષ્ટ્રવાદની લડાઈ
પીએમ મોદીએ ભાજપના બૂથ સ્તરના કાર્યકરોને સંબોધતા કહ્યું કે, "કોંગ્રેસ અને ડીએમકે માટે હંમેશા 'પરિવાર પહેલા' રહ્યો છે, જ્યારે ભાજપ અને એનડીએ (NDA) માટે 'પુડુચેરી પહેલા અને ભારત પહેલા'ની નીતિ છે." તેમણે કાર્યકરોને આદેશ આપ્યો હતો કે તેઓ દરેક યુવાનના ઘર સુધી પહોંચે અને તેમને સમજાવે કે વિપક્ષી દળો માત્ર સત્તા મેળવીને લૂંટ ચલાવવાના ઈરાદા સાથે લડી રહ્યા છે, જ્યારે ભાજપ જનતાના કલ્યાણ માટે કટિબદ્ધ છે.
વિપક્ષી ખેંચતાણ પર કટાક્ષ
વડાપ્રધાને કોંગ્રેસ અને ડીએમકે વચ્ચેના આંતરિક વિખવાદ પર કટાક્ષ કરતા કહ્યું કે, ભલે તેઓ અત્યારે એકબીજા સાથે લડતા દેખાતા હોય, પરંતુ તેમનો મૂળ સ્વભાવ ક્યારેય બદલાવાનો નથી. તેઓ જાણે છે કે જનતા તેમને બીજી તક આપવાની નથી, તેથી તેઓ અત્યારથી જ લૂંટનો મોટો હિસ્સો કોને મળશે તે બાબતે લડી રહ્યા છે. મોદીએ ભાજપના કાર્યકરોની પ્રશંસા કરતા કહ્યું કે તેમણે વિપક્ષીઓના "દુષ્કૃત્યો" ને જનતા સમક્ષ લાવવામાં પ્રશંસનીય કામગીરી કરી છે.
'વ્હિસલ ક્રાંતિ' અને ભાજપની રણનીતિ
પુડુચેરીમાં રાજકીય સમીકરણો બદલાઈ રહ્યા છે ત્યારે પીએમ મોદીનો આ સંવાદ કાર્યકરો માટે 'બુસ્ટર ડોઝ' સમાન સાબિત થયો છે. તેમણે દરેક નાગરિકને મળીને ભાજપના વિકાસના એજન્ડાને પહોંચાડવા પર ભાર મૂક્યો હતો. પીએમ મોદીએ વિશ્વાસ વ્યક્ત કર્યો કે પુડુચેરીના લોકો આ વખતે વિકાસલક્ષી શાસનને પસંદ કરશે અને પરિવારવાદના રાજકારણને તિલાંજલિ આપશે.