ચંદીગઢ : પંજાબના મુખ્યમંત્રી ભગવંત માને સોમવારે રાજ્યના યુવાનો સાથે સંવાદ સાધતા પોતાના જીવનનો એક એવો કિસ્સો શેર કર્યો જે આજે સોશિયલ મીડિયા પર વાયરલ થઈ રહ્યો છે. માને સફળતા માટે 'મેનિફેસ્ટો' એટલે કે 'સકારાત્મક સંકલ્પ'ની શક્તિ પર ભાર મૂકતા જણાવ્યું કે, કેવી રીતે એક સામાન્ય કલાકારમાંથી તેઓ રાજ્યના સર્વોચ્ચ પદ સુધી પહોંચ્યા. તેમણે યુવાનોને શિખામણ આપી કે જો તમારામાં દ્રઢ નિશ્ચય હોય, તો દુનિયાની કોઈ શક્તિ તમને સફળ થતા રોકી શકતી નથી.
CM હાઉસની બહાર ઉભા રહીને જોયેલું સપનું
ભૂતકાળની યાદો તાજી કરતા ભગવંત માને જણાવ્યું કે, મુખ્યમંત્રી બન્યાના વર્ષો પહેલા જ્યારે પણ તેઓ ચંદીગઢ આવતા, ત્યારે જાણીજોઈને મુખ્યમંત્રી નિવાસસ્થાનની બહાર ઉભા રહેતા. ક્યારેક બપોરે તો ક્યારેક મોડી રાત્રે તેઓ ત્યાં તૈનાત સુરક્ષાકર્મીઓ સાથે વાતો કરતા અને મજાકમાં પણ મક્કમતાથી કહેતા, "આ ઘરને સાફ રાખજો, એક દિવસ હું અહીં રહેવા અને મુખ્યમંત્રીની ખુરશી પર બેસવા ચોક્કસ આવીશ." આજે તેમનો એ જ સંકલ્પ હકીકત બની ગયો છે. તેમણે આ સફળતા પાછળ એક IPS અધિકારીના વ્યાખ્યાનને શ્રેય આપ્યો, જેમણે સાયકલ પરથી ઓફિસરની કાર સુધી પહોંચવાનો મંત્ર આપ્યો હતો.
વિદ્યાર્થીઓએ ડ્રોન અને ઈ-બાઈક બનાવી કમાયા ₹70 કરોડ
મુખ્યમંત્રીએ માત્ર વાતો જ નહીં, પરંતુ પંજાબના યુવાનોને આત્મનિર્ભર બનાવવા માટે સરકારના 'બિઝનેસ ક્લાસ પ્રોગ્રામ'ની સફળતા પર પણ પ્રકાશ પાડ્યો. આ કાર્યક્રમ હેઠળ ધોરણ 11 અને 12 ના વિદ્યાર્થીઓને નવા આઈડિયા પર કામ કરવા માટે ₹2,000 ની સીડ મની આપવામાં આવે છે. શિક્ષણ મંત્રી હરજોત બેન્સે આશ્ચર્યજનક માહિતી આપતા જણાવ્યું કે, પંજાબના વિદ્યાર્થીઓએ આ પ્રોગ્રામ દ્વારા અત્યાર સુધીમાં ₹70 કરોડની કમાણી કરી છે. વિદ્યાર્થીઓએ ડ્રોન, એન્ટી-ડ્રોન સિસ્ટમ, ઈ-બાઈક અને પરાળી વ્યવસ્થાપન માટે અદ્યતન મશીનોના પ્રોટોટાઈપ તૈયાર કર્યા છે, જેની માંગ હવે મોટા ઉદ્યોગપતિઓ કરી રહ્યા છે.
નોકરી શોધનારા નહીં, સર્જક બનો
રાજ્ય સરકારે હવે આ ઉદ્યોગસાહસિકતા તાલીમને ધોરણ 11 થી તમામ વિદ્યાર્થીઓ માટે ફરજિયાત બનાવી દીધી છે. ભગવંત માનનું લક્ષ્ય પંજાબના યુવાનોને માત્ર ડિગ્રીધારક બનાવવા પૂરતું સીમિત નથી, પરંતુ તેમને 'જોબ ક્રિએટર' (નોકરી આપનાર) બનાવવાનું છે. આ કાર્યક્રમ દ્વારા પંજાબના ગામડાઓમાંથી પણ હવે નાના ઉદ્યોગસાહસિકો બહાર આવી રહ્યા છે, જે રાજ્યના આર્થિક ભવિષ્ય માટે એક આશાસ્પદ સંકેત છે.