ગુવાહાટી: આસામ વિધાનસભા ચૂંટણી 2026 માટે રાજકીય જંગ જામ્યો છે ત્યારે ભારતીય જનતા પાર્ટીએ આજે પોતાનું ટ્રમ્પ કાર્ડ ખેલ્યું છે. ગુવાહાટીમાં આયોજિત એક ભવ્ય કાર્યક્રમમાં કેન્દ્રીય નાણાં મંત્રી નિર્મલા સીતારમણે મુખ્યમંત્રી હિમંતા બિસ્વા શર્મા અને કેન્દ્રીય મંત્રી સર્વાનંદ સોનોવાલની હાજરીમાં પાર્ટીનો ચૂંટણી ઢંઢેરો જાહેર કર્યો હતો. ભાજપે આ વખતે આસામના મતદારોને રીઝવવા માટે "સુરક્ષિત આસામ, વિકસિત આસામ"ની થીમ હેઠળ 31 મોટી પ્રતિબદ્ધતાઓ વ્યક્ત કરી છે.

UCC અને અતિક્રમણ મુક્તિનો એજન્ડા

ભાજપના સંકલ્પ પત્રમાં સૌથી મહત્વનો મુદ્દો સમાન નાગરિક સંહિતા (UCC) નો છે. જોકે, આદિવાસી સમુદાયો અને છઠ્ઠા અનુસૂચિના વિસ્તારોની પરંપરાઓને ધ્યાનમાં રાખીને તેમને આમાંથી બાકાત રાખવાનો પ્રસ્તાવ મૂકવામાં આવ્યો છે. આ ઉપરાંત, સરકારી જમીનો પરથી ગેરકાયદેસર અતિક્રમણ હટાવવા અને 1950ના ઇમિગ્રન્ટ્સ એક્ટને કડક રીતે લાગુ કરીને ઘૂસણખોરી રોકવાનું વચન આપવામાં આવ્યું છે, જે આસામના રાજકારણમાં હંમેશા કેન્દ્રસ્થાને રહ્યું છે.

યુવાનો અને ગરીબો માટે વચનોનો વરસાદ

બેરોજગારીના મુદ્દે વિપક્ષને ઘેરવા માટે ભાજપે આગામી પાંચ વર્ષમાં 2 લાખ સરકારી નોકરીઓ આપવાનું અને 8મા પગાર પંચનો અમલ કરવાનું વચન આપ્યું છે. ગરીબ પરિવારો માટે શિક્ષણનો બોજ હળવો કરવા 'KG થી PG' (બાલમંદિરથી અનુસ્નાતક) સુધીનું મફત શિક્ષણ અને મહિલાઓ માટે 'ઓરુનોડોઈ' સહાય વધારીને માસિક ₹3,000 કરવાની જાહેરાત કરવામાં આવી છે.

ઇન્ફ્રાસ્ટ્રક્ચર અને કનેક્ટિવિટી પર ફોકસ

આસામને આધુનિક બનાવવા માટે ભાજપે નવા એક્સપ્રેસવે અને રાજ્યના વિવિધ ભાગોને જોડતી વધુ વંદે ભારત ટ્રેનો શરૂ કરવાનો રોડમેપ રજૂ કર્યો છે. કેન્દ્રીય મંત્રી નિર્મલા સીતારમણે વિશ્વાસ વ્યક્ત કર્યો હતો કે આ ઢંઢેરો આસામના સર્વાંગી વિકાસની બ્લુપ્રિન્ટ સાબિત થશે.

હવે જોવાનું એ રહેશે કે ભાજપના આ "સંકલ્પ" પર આસામની જનતા કેટલો ભરોસો મૂકે છે અને આગામી ચૂંટણીમાં આ વચનો વોટમાં પરિવર્તિત થાય છે કે કેમ. આસામમાં સત્તા જાળવી રાખવા માટે ભાજપે આ વખતે વિકાસની સાથે સાંસ્કૃતિક સુરક્ષાને પણ પૂરતું મહત્વ આપ્યું છે.