બેરુત: ઇઝરાયલ અને હિઝબુલ્લાહ વચ્ચે ચાલી રહેલા ભીષણ સંઘર્ષમાં ઇઝરાયલી સંરક્ષણ દળો (IDF) એ એક મોટી સફળતા મેળવી છે. લેબનોનની રાજધાની બેરુતમાં ઇઝરાયલી નૌકાદળ દ્વારા કરવામાં આવેલા એક વ્યૂહાત્મક ઓપરેશનમાં હિઝબુલ્લાહના દક્ષિણ મોરચાના અત્યંત પ્રભાવશાળી કમાન્ડર હજ યુસુફ ઇસ્માઇલ હાશેમને મારી નાખવામાં આવ્યો છે. આ હુમલાથી હિઝબુલ્લાહના સંગઠનમાં સોપો પડી ગયો છે.

હજારો હુમલાઓનો માસ્ટરમાઇન્ડ

IDF દ્વારા જારી કરવામાં આવેલા સત્તાવાર નિવેદન અનુસાર, ઇસ્માઇલ હાશેમ વર્ષોથી ઇઝરાયલી નાગરિકો અને સૈનિકો વિરુદ્ધ આતંકવાદી ગતિવિધિઓનું સંચાલન કરી રહ્યો હતો. તેના નેતૃત્વમાં ઇઝરાયલની સરહદો પર હજારો હુમલાઓનું આયોજન અને અમલીકરણ કરવામાં આવ્યું હતું. તે દક્ષિણ લેબનોનમાં સક્રિય રહીને ઇઝરાયલી સૈનિકો માટે સતત ખતરો બનેલો હતો.

હિઝબુલ્લાહની ક્ષમતાને પહોંચ્યો મોટો ફટકો

સંરક્ષણ નિષ્ણાતોના મતે, હાશેમનું મૃત્યુ એ માત્ર એક સભ્યનું જવું નથી, પરંતુ ઇઝરાયલ સામે લડવાની હિઝબુલ્લાહની ક્ષમતા પરનો મોટો પ્રહાર છે. ખાસ કરીને દક્ષિણ લેબનોન જેવા વ્યૂહાત્મક વિસ્તારોમાં જ્યાં IDF સૈનિકો અને હિઝબુલ્લાહ આમને-સામને છે, ત્યાં હવે આતંકી સંગઠનની કમાન્ડ અને કંટ્રોલ સિસ્ટમ ખોરવાઈ જવાની શક્યતા છે.

સરહદ પર તણાવ વધવાની આશંકા

બેરુતમાં થયેલા આ હુમલા બાદ સમગ્ર વિસ્તારમાં હાઈ એલર્ટ જાહેર કરવામાં આવ્યું છે. ઇઝરાયલે સ્પષ્ટ કર્યું છે કે તે પોતાના નાગરિકોની સુરક્ષા માટે કોઈપણ હદ સુધી જવા તૈયાર છે. બીજી તરફ, હિઝબુલ્લાહ આ મોટા કમાન્ડરના મોતનો બદલો લેવા માટે જવાબી કાર્યવાહી કરી શકે છે, જેના કારણે લેબનોન અને ઇઝરાયલ સરહદે તણાવ વધુ ઉગ્ર બનવાના એંધાણ વર્તાઈ રહ્યા છે.

ઇઝરાયલી વાયુસેના અને નૌકાદળ દ્વારા બેરુત પર કરવામાં આવતી આ સતત કાર્યવાહી દર્શાવે છે કે ઇઝરાયલ હવે આતંકી સંગઠનોના ટોચના નેતૃત્વને નિશાન બનાવીને તેમને જડમૂળથી ઉખેડી નાખવાની રણનીતિ પર કામ કરી રહ્યું છે.