તિરુચિરાપલ્લી: તમિલનાડુના રાજકારણમાં પોતાની નવી ઈનિંગ શરૂ કરનાર સુપરસ્ટાર વિજયની લોકપ્રિયતા રસ્તાઓ પર ઉતરી આવી છે. ગુરુવારે ત્રિચી (તિરુચિરાપલ્લી) ખાતે 'તમિલગા વેત્રી કઝગમ' (TVK) ના વડા વિજયના ભવ્ય રોડ શો દરમિયાન હજારો સમર્થકોની ભીડને કારણે મોટી દુર્ઘટના સર્જાઈ હતી. આ હંગામા અને ધક્કામુક્કીમાં સુરક્ષા ફરજ પર તૈનાત સતીશ નામના એક પોલીસ અધિકારી ગંભીર રીતે ઘાયલ થયા હોવાના અહેવાલ છે.
ભીડ વચ્ચે પોલીસકર્મીની ચીસ સંભળાઈ
ઘટના ત્રિચીના ગાંધી માર્કેટ નજીક મરક્કડાઈ જંકશન પાસે બની હતી, જ્યાં વિજય પોતાના સમર્થકોને સંબોધન કરવાના હતા. વાયરલ થયેલા વીડિયોમાં જોઈ શકાય છે કે સતીશ નામના પોલીસકર્મીને પગના ભાગે ગંભીર ઈજા થઈ છે અને તેઓ પીડાથી કણસી રહ્યા છે. આસપાસ ઉભેલા પક્ષના સ્વયંસેવકોએ તાત્કાલિક માનવ સાંકળ બનાવી રસ્તો સાફ કર્યો અને ઘાયલ અધિકારીને ઉપાડીને નજીકમાં ઉભેલી એમ્બ્યુલન્સ સુધી પહોંચાડ્યા હતા. હાલમાં આ મામલે પોલીસ ફરિયાદ નોંધવામાં આવી છે.
ચૂંટણી જંગમાં ત્રિપાંખિયો જંગ
અભિનેતા વિજય આગામી ૨૩ એપ્રિલની ચૂંટણીમાં પેરામ્બુર અને ત્રિચી પૂર્વ એમ બે બેઠકો પરથી ચૂંટણી લડી રહ્યા છે. તેઓ ડીએમકે (DMK) ના દિગ્ગજ ઉમેદવારો આર.ડી. સેકર અને ઈનિગો એસ. ઈરુદયરાજ સામે મેદાનમાં છે. સોમવારે ચેન્નાઈના પેરામ્બુર ખાતે ઉમેદવારી પત્ર ભર્યા બાદ વિજયે વિશ્વાસ વ્યક્ત કર્યો હતો કે જનતા તેમના પક્ષના પ્રતીક 'વ્હિસલ' ને સમર્થન આપીને રાજ્યમાં પરિવર્તન લાવશે.
ઐતિહાસિક ગઢ જીતવાનો પડકાર
પેરામ્બુર બેઠક ૨૦૧૬ સુધી સીપીઆઈ (એમ) નો મજબૂત ગઢ માનવામાં આવતી હતી, જે અત્યારે ડીએમકે પાસે છે. વિજયની રાજકીય સફરનો આ પ્રથમ અને સૌથી મોટો પડકાર છે. રોડ શોમાં ઉમટેલી આ ભીડને વિજયના સમર્થકો તેમની જીતનો સંકેત માની રહ્યા છે, પરંતુ વધતી જતી ભીડને કારણે કાયદો અને વ્યવસ્થા જાળવવી હવે પોલીસ માટે માથાનો દુખાવો બની રહી છે.
ટીવીકે ચીફના આ પ્રચંડ પ્રચાર અભિયાનથી તમિલનાડુના રાજકારણમાં ગરમાવો આવી ગયો છે.