દુબઈ: યુનાઈટેડ આરબ અમીરાતના દુબઈમાં વસતા ભારતીય સમુદાય અને અન્ય શ્રદ્ધાળુઓ માટે મહત્વના સમાચાર સામે આવ્યા છે. દુબઈ સત્તાવાળાઓ દ્વારા સુરક્ષા અને સલામતીના કારણોને ટાંકીને આપવામાં આવેલા નિર્દેશો બાદ શહેરના પ્રખ્યાત હિન્દુ મંદિર અને ગુરુ નાનક દરબાર ગુરુદ્વારાને આગામી સૂચના સુધી કામચલાઉ ધોરણે બંધ કરી દેવામાં આવ્યા છે. આ નિર્ણય શુક્રવારથી અમલી બનતા હજારો શ્રદ્ધાળુઓના દર્શન પર રોક લાગી છે.

સુરક્ષાના કારણોસર લેવાયો નિર્ણય:
હિન્દુ ટેમ્પલ દુબઈના મેનેજમેન્ટ દ્વારા જારી કરવામાં આવેલા સત્તાવાર નિવેદનમાં જણાવવામાં આવ્યું છે કે, સલામતી અને સુરક્ષાના કારણોસર મંદિર આગામી આદેશ સુધી બંધ રહેશે. મેનેજમેન્ટે ભાવિકોને પડનારી અસુવિધા બદલ માફી માંગી છે અને સૌના કલ્યાણ માટે પ્રાર્થના કરવાની સાથે સહકાર આપવા વિનંતી કરી છે. બીજી તરફ, ગુરુ નાનક દરબાર ગુરુદ્વારાના ચેરમેન સુરેન્દર સિંહ કંધારીએ પુષ્ટિ કરી છે કે તેમને દુબઈના કોમ્યુનિટી ડેવલપમેન્ટ ઓથોરિટી (CDA) તરફથી ગુરુદ્વારા બંધ રાખવાની સૂચનાઓ મળી છે, જે સાવચેતીના ભાગરૂપે લેવાયેલું પગલું છે.

ચર્ચોમાં પણ પ્રાર્થના સભાઓ રદ:
માત્ર મંદિર અને ગુરુદ્વારા જ નહીં, પરંતુ દુબઈના અનેક ચર્ચોએ પણ સમાન સત્તાવાર માર્ગદર્શન હેઠળ તેમની ઇન-પર્સન સેવાઓ સ્થગિત કરી દીધી છે. ગુડ ફ્રાઈડેના પવિત્ર દિવસે જ ચર્ચો બંધ રહેતા અનેક શ્રદ્ધાળુઓ ચર્ચના બંધ દરવાજા બહાર પ્રાર્થના કરતા જોવા મળ્યા હતા. મોટાભાગના ચર્ચોએ શ્રદ્ધાળુઓને ઘરે બેસીને ઓનલાઇન લાઇવ સ્ટ્રીમિંગ દ્વારા પ્રાર્થનામાં જોડાવા અપીલ કરી છે.

ભાવિકોમાં મિશ્ર પ્રતિસાદ:
અચાનક લેવાયેલા આ નિર્ણયથી એવા ભાવિકો મુશ્કેલીમાં મુકાયા હતા જેઓ મોડી રાત્રે થયેલી આ જાહેરાતથી અજાણ હતા અને દર્શન માટે ધર્મસ્થાનો પર પહોંચી ગયા હતા. દુબઈ સત્તાવાળાઓ દ્વારા સુરક્ષા વ્યવસ્થાને પ્રાધાન્ય આપીને લેવામાં આવેલા આ પગલાને પગલે હવે આગામી સૂચના ક્યારે મળશે તેની શ્રદ્ધાળુઓ આતુરતાથી રાહ જોઈ રહ્યા છે. હાલમાં તમામ ધાર્મિક સંસ્થાઓએ ડિજિટલ માધ્યમોનો ઉપયોગ કરીને ભાવિકો સાથે સંપર્ક જાળવી રાખ્યો છે.