ચેન્નાઈ:  તમિલનાડુમાં ૨૦૨૬ની વિધાનસભા ચૂંટણીની ગરમાહટ અત્યારથી જ જોવા મળી રહી છે, પરંતુ આ વખતે જંગ મેદાનની સાથે રૂપેરી પડદે પણ શરૂ થયો છે. દિગ્દર્શક ઉમાપતિ રમૈયાની આગામી ફિલ્મ 'TN 2026 – થંગા નટચાથિરામ' ના ટીઝરે રિલીઝ થતાની સાથે જ રાજકીય ગલિયારાઓમાં ભૂકંપ લાવી દીધો છે. આ ફિલ્મને અભિનેતામાંથી રાજકારણી બનેલા લોકપ્રિય સ્ટાર થલાપતિ વિજયની પેરોડી (મજાક) તરીકે જોવામાં આવી રહી છે.
ટીઝરમાં જોવા મળી વિજયની ઝલક
ગુરુવારે રિલીઝ થયેલા આ ટીઝરમાં અભિનેતા નેટી નટરાજ મુખ્ય ભૂમિકામાં છે. ટીઝરમાં તેમનો પહેરવેશ, ચાલવાની ઢબ અને તેમની વિશિષ્ટ દાઢી પણ થલાપતિ વિજયની સ્ટાઈલને આબેહૂબ મળતી આવે છે. ફિલ્મની વાર્તા એક એવા સુપરસ્ટારની આસપાસ ફરે છે જે મુખ્યમંત્રી બનવાના સપના સાથે રાજકારણમાં પ્રવેશ કરે છે. વિજયના ચાહકો આને તેમના મનપસંદ અભિનેતા પરનો સીધો 'હુમલો' માની રહ્યા છે.
ચૂંટણી ટાણે 'વ્યૂહાત્મક' હુમલો?
આ ફિલ્મનું નિર્માણ દુબઈ સ્થિત ઉદ્યોગપતિ કન્નન રવિ દ્વારા કરવામાં આવ્યું છે. જાણકારોનું કહેવું છે કે નિર્માતાના શાસક પક્ષ સાથેના ગાઢ સંબંધોને કારણે આ ફિલ્મ જાણીજોઈને ચૂંટણીના માહોલમાં વિજયની છબી ખરડવા માટે બનાવવામાં આવી છે. વિવેચકો દલીલ કરી રહ્યા છે કે આવી ફિલ્મો મતદારોના મન પર અન્યાયી પ્રભાવ પાડી શકે છે, જેના કારણે સોશિયલ મીડિયા પર સેન્સર બોર્ડ (CBFC) ને ટેગ કરીને ફિલ્મ પર રોક લગાવવાની માંગ ઉઠી છે.
સ્ટાર કાસ્ટ અને વિવાદનો વંટોળ
'TN 2026' માં નેટી નટરાજની સાથે થંબી રમૈયા, એમ.એસ. ભાસ્કર અને યાશિકા આનંદ જેવા જાણીતા કલાકારો મુખ્ય ભૂમિકામાં છે. ૧૦ એપ્રિલ, ૨૦૨૬ ના રોજ સિનેમાઘરોમાં આવનારી આ ફિલ્મ તમિલનાડુના રાજકીય સમીકરણોમાં કેવો વળાંક લાવે છે તે જોવું રસપ્રદ રહેશે. વિજયના સમર્થકો અત્યારે સોશિયલ મીડિયા પર આ ફિલ્મના વિરોધમાં કેમ્પેઈન ચલાવી રહ્યા છે.