નવી દિલ્હી: પશ્ચિમ એશિયામાં ભભૂકી રહેલી યુદ્ધની જ્વાળાઓ વચ્ચે ભારતમાં ઈરાનના રાજદૂત મોહમ્મદ ફતહ અલીએ અમેરિકા અને ઈઝરાયેલની સૈન્ય કાર્યવાહીને 'વ્યૂહાત્મક નિષ્ફળતા' ગણાવીને ખળભળાટ મચાવી દીધો છે. સોશિયલ મીડિયા પ્લેટફોર્મ X પર એક ધારદાર પોસ્ટ દ્વારા તેમણે દાવો કર્યો છે કે વિશ્વના અગ્રણી થિંક ટેન્કોના અહેવાલો સાબિત કરે છે કે ઈરાન વિરુદ્ધની પશ્ચિમી દેશોની યોજનાઓ ધૂળમાં મળી રહી છે. ફતહ અલીના મતે, ઈરાન પાસે દબાણને તાકાતમાં ફેરવવાની અદભૂત ક્ષમતા છે અને આ સંઘર્ષ ઈરાનની ક્ષમતાઓને નબળી પાડવાને બદલે તેને વૈશ્વિક સ્તરે વધુ મજબૂત સાબિત કરી રહ્યો છે.

રાજદૂતે ઈરાની-ઈસ્લામિક સભ્યતાની સ્થિતિસ્થાપકતા પર ભાર મૂકતા જણાવ્યું કે ઈરાની જનતા અને સૈન્યની એકતા કોઈ પણ બાહ્ય આક્રમણને તોડી પાડવા માટે સક્ષમ છે. બીજી તરફ, ઈરાની સૈન્યના પ્રવક્તા ઈબ્રાહિમ ઝોલ્ફાઘરીએ અમેરિકી પ્રમુખ ડોનાલ્ડ ટ્રમ્પની ધમકીઓનો જડબાતોડ જવાબ આપ્યો છે. ટ્રમ્પે 'ટ્રુથ સોશિયલ' પર ઈરાનના પુલ અને પાવર પ્લાન્ટ્સને નિશાન બનાવવાની જે વાત કરી હતી, તેના જવાબમાં ઈરાને સ્પષ્ટ કર્યું છે કે જો નાગરિક ઈન્ફ્રાસ્ટ્રક્ચરને નુકસાન થશે, તો તેનો બદલો માત્ર લશ્કરી થાણાઓ પૂરતો સીમિત નહીં રહે, પરંતુ સમગ્ર પ્રદેશમાં ફેલાયેલી અમેરિકી સંપત્તિઓ પર કાળો કેર વર્તાવવામાં આવશે.

વર્તમાન સ્થિતિમાં 'ઓપરેશન એપિક ફ્યુરી' એક અત્યંત નાજુક તબક્કે પહોંચી ગયું છે. ૨૮ ફેબ્રુઆરીથી ચાલી રહેલા આ સૈન્ય અભિયાનમાં અત્યાર સુધી ઈરાનના અનેક મહત્વના મથકોને નિશાન બનાવાયા છે, પરંતુ ઈરાન હજુ પણ નમવા તૈયાર નથી. ઈરાની રાજદૂતનું આ નિવેદન દર્શાવે છે કે તેહરાન હવે રક્ષણાત્મક નહીં પણ આક્રમક મૂડમાં છે. અમેરિકાના પ્રાદેશિક સાથી દેશો, જ્યાં અમેરિકી સૈન્ય મથકો આવેલા છે, તેમના પર પણ જોખમ વધ્યું છે. આ નિવેદનબાજી અને જમીની સ્તર પરની હકીકત વચ્ચે હવે સમગ્ર વિશ્વની નજર એ વાત પર છે કે શું આ યુદ્ધ અણુશસ્ત્રોના ઉપયોગ સુધી પહોંચશે કે પછી કોઈ રાજદ્વારી રસ્તો નીકળશે.