રોમ : અમેરિકા અને ઈરાન વચ્ચે ચાલી રહેલા ભીષણ સંઘર્ષની વચ્ચે હવે ધર્મ અને યુદ્ધના નૈતિક મૂલ્યોને લઈને નવી ચર્ચા છેડાઈ છે. અમેરિકી સંરક્ષણ સચિવ પીટ હેગસેથે તાજેતરમાં અમેરિકન લોકોને મધ્ય પૂર્વમાં સૈન્ય વિજય માટે "ઈસુ ખ્રિસ્તના નામે" દરરોજ ઘૂંટણિયે બેસીને પ્રાર્થના કરવાનું આહ્વાન કર્યું હતું. જોકે, હેગસેથના આ નિવેદન સામે કેથોલિક સંપ્રદાયના સર્વોચ્ચ ધર્મગુરુ પોપ લીઓ ચૌદમાએ (Pope Leo XIV) તીખી પ્રતિક્રિયા આપી છે. પોપે સ્પષ્ટ શબ્દોમાં જણાવ્યું છે કે લશ્કરી પ્રભુત્વની ઈચ્છા એ ઈસુ ખ્રિસ્તના માર્ગથી તદ્દન અજાણ અને વિકૃત માનસિકતા છે.
રોમમાં પવિત્ર ગુરુવારના અવસરે આયોજિત વિશેષ પ્રાર્થના સભામાં પોપ લીઓએ હેગસેથનું નામ લીધા વિના તેમના પર આકરા પ્રહાર કર્યા હતા. તેમણે કહ્યું કે, "જ્યારે આપણે બીજાનો નાશ કરીએ છીએ ત્યારે આપણે પોતાને વિજયી માનીએ છીએ, પરંતુ ઈશ્વરે આપણને ઉદાહરણ આપ્યું છે કે જીવનનો નાશ કેવી રીતે કરવો તે નહીં, પણ જીવન કેવી રીતે આપવું." ફેબ્રુઆરીના અંતમાં જ્યારે અમેરિકા અને ઈઝરાયેલે ઈરાન પર બોમ્બમારો શરૂ કર્યો, ત્યારથી પોપ સતત હિંસાનો અંત લાવવા અને શાંતિપૂર્ણ સંવાદનો માર્ગ અપનાવવા આગ્રહ કરી રહ્યા છે.
પોપ લીઓ, જેઓ અમેરિકામાં જન્મેલા પ્રથમ પોન્ટિફ છે, તેમણે અત્યાર સુધી ટ્રમ્પ વહીવટીતંત્ર સાથે સીધો મુકાબલો ટાળ્યો હતો, પરંતુ યુદ્ધ માટે ધર્મનો ઉપયોગ થતા તેઓ વ્યથિત જણાયા હતા. માર્ચના અંતમાં આપેલા એક પ્રવચનમાં તેમણે ચેતવણી આપી હતી કે ઈસુ ક્યારેય યુદ્ધ કરનારાઓની પ્રાર્થના સાંભળતા નથી. વેટિકન દ્વારા જારી કરાયેલા નિવેદન મુજબ, પોપે શુક્રવારે ઈઝરાયેલના રાષ્ટ્રપતિ આઈઝેક હર્ઝોગ સાથે પણ ફોન પર વાત કરી હતી અને મધ્ય પૂર્વમાં "ન્યાયી અને કાયમી શાંતિ" સ્થાપિત કરવા માટે હિંસા રોકવા પર ભાર મૂક્યો હતો.
રાષ્ટ્રપતિ ટ્રમ્પના કટ્ટર સમર્થક ગણાતા પીટ હેગસેથના નિવેદનોએ ખ્રિસ્તી સમુદાયમાં પણ બે ભાગ પાડી દીધા છે. એક તરફ એવા લોકો છે જેઓ યુદ્ધને ધાર્મિક દ્રષ્ટિકોણથી જોઈ રહ્યા છે, તો બીજી તરફ વેટિકન દ્વારા શાંતિ અને મુક્તિના માર્ગ પર ભાર મૂકવામાં આવી રહ્યો છે. પોપના આ આકરા વલણથી હવે આંતરરાષ્ટ્રીય સ્તરે યુદ્ધની નૈતિકતા પર ગંભીર સવાલો ઊભા થયા છે. હવે જોવાનું એ રહેશે કે વ્હાઇટ હાઉસ વેટિકનના આ શાંતિ સંદેશને કેટલી ગંભીરતાથી લે છે.