નવી દિલ્હી : ભારત સરકાર હવે સોશિયલ મીડિયા પ્લેટફોર્મ્સ પર બાળકોની સુરક્ષાને લઈને અત્યંત કડક વલણ અપનાવવા જઈ રહી છે. વધતા જતા સાયબર ક્રાઈમ, ઓનલાઈન છેતરપિંડી અને બાળકોમાં સોશિયલ મીડિયાના આંધળા વ્યસનને રોકવા માટે સરકાર 'KYC' (Know Your Customer) સિસ્ટમ દાખલ કરવાનું વિચારી રહી છે. આ નવા નિયમ મુજબ, કોઈપણ સોશિયલ મીડિયા એકાઉન્ટ ખોલતા પહેલા યુઝરે પોતાની વય અને ઓળખની ખાતરી કરવા માટે સત્તાવાર દસ્તાવેજો સબમિટ કરવા પડશે, જેથી સગીરોને પ્રતિબંધિત કન્ટેન્ટ અને પ્લેટફોર્મથી દૂર રાખી શકાય.
વર્તમાન સમયમાં બાળકો ખૂબ જ નાની ઉંમરે ઈન્સ્ટાગ્રામ, ટિકટોક અને યુટ્યુબ જેવા પ્લેટફોર્મ્સ પર સક્રિય થઈ રહ્યા છે. જાપાનીઝ ઝૂના વાનર 'પંચ કુન'ના વાયરલ વિડિયો જેવી સામગ્રીમાં બાળકો કલાકો સુધી ડૂબેલા રહે છે, જે તેમના માનસિક વિકાસ પર ગંભીર અસર કરે છે. નિષ્ણાતોના મતે, આ 'ડિજિટલ વ્યસન' બાળકોમાં એકાગ્રતાનો અભાવ અને સામાજિક એકલતા પેદા કરી રહ્યું છે. KYC પ્રક્રિયા દ્વારા સરકાર એ સુનિશ્ચિત કરવા માંગે છે કે બાળકો તેમની વય મર્યાદા મુજબનું જ કન્ટેન્ટ જુએ અને સોશિયલ મીડિયા કંપનીઓ પણ બાળકોના ડેટાનો દુરુપયોગ ન કરે.
જોકે, આ દરખાસ્તને લઈને ટેક નિષ્ણાતોમાં બે ભાગલા જોવા મળી રહ્યા છે. એક વર્ગ માને છે કે બાળકોની સુરક્ષા માટે આ એક અનિવાર્ય 'સેફ્ટી નેટ' છે, જ્યારે બીજો વર્ગ તેને પ્રાઈવસી પર ત્રાપ અને સર્વેલન્સ (દેખરેખ) ના સાધન તરીકે જોઈ રહ્યો છે. તેમ છતાં, વધતી જતી આત્મહત્યાઓ, ઓનલાઈન બુલિંગ અને ભ્રામક માહિતીના ફેલાવાને જોતા, ભારત સરકાર હવે ચીન અને યુરોપિયન દેશોની જેમ જ સોશિયલ મીડિયા પર વય મર્યાદા અને સ્ક્રીન ટાઇમ કંટ્રોલ કરવા માટે મક્કમ દેખાઈ રહી છે. આગામી દિવસોમાં આ અંગેના નવા દિશાનિર્દેશો જાહેર થવાની પૂરેપૂરી શક્યતા છે.