પંચકુલા : હરિયાણાના રાજકારણના દિગ્ગજ નેતા અને પૂર્વ મુખ્યમંત્રી ભૂપિન્દર સિંહ હુડ્ડા માટે શનિવારનો દિવસ મોટી રાહત લઈને આવ્યો છે. પંચકુલાની એક ખાસ અદાલતે હુડ્ડા અને એસોસિએટેડ જર્નલ્સ લિમિટેડ (AJL) વિરુદ્ધ ચાલી રહેલા એન્ફોર્સમેન્ટ ડિરેક્ટોરેટ (ED)ના મની લોન્ડરિંગ કેસને સત્તાવાર રીતે બંધ કરવાનો આદેશ આપ્યો છે. આ સાથે જ વર્ષોથી ચાલી રહેલા પંચકુલા જમીન ફાળવણી વિવાદમાં હુડ્ડાને મોટી કાયદાકીય જીત મળી છે.
આ કેસનો પાયો ૧૯૮૨માં નખાયો હતો, જ્યારે પંચકુલાના સેક્ટર ૬માં નેશનલ હેરાલ્ડ અખબાર માટે AJLને એક પ્લોટ ફાળવવામાં આવ્યો હતો. ૧૯૯૨માં બાંધકામ ન થવાને કારણે આ ફાળવણી રદ થઈ હતી, પરંતુ ૨૦૦૫માં જ્યારે ભૂપિન્દર સિંહ હુડ્ડા મુખ્યમંત્રી બન્યા, ત્યારે આ પ્લોટ ફરીથી જૂના દરો પર જ AJLને ફાળવી દેવામાં આવ્યો હતો. આ પુનઃ ફાળવણીમાં અનિયમિતતા અને સરકારી તિજોરીને નુકસાન પહોંચાડવાનો આરોપ લગાવીને ૨૦૧૬માં તપાસ શરૂ કરવામાં આવી હતી, જે બાદમાં CBI અને ED સુધી પહોંચી હતી.
ખાસ અદાલતનો આ નિર્ણય પંજાબ અને હરિયાણા હાઈકોર્ટના ફેબ્રુઆરી ૨૦૨૬ના ચુકાદાને આધારીત છે. હાઈકોર્ટે અવલોકન કર્યું હતું કે રેકોર્ડ પર રહેલી સામગ્રીમાં કોઈ ગુનાહિત કાવતરું કે છેતરપિંડી સાબિત થતી નથી, અને તેથી CBI દ્વારા નોંધાયેલો મૂળ ગુનો (Predicate Offence) જ રદ કરી દેવામાં આવ્યો હતો. કાયદા મુજબ, જો મૂળ ગુનો જ રદ થઈ જાય, તો તેના આધારે ચાલતી EDની મની લોન્ડરિંગની કાર્યવાહી ટકી શકે નહીં. આ ટેકનિકલ અને કાયદાકીય પાસાને ધ્યાને રાખીને ખાસ જજ રાજીવ ગોયલે EDનો કેસ પણ બંધ કરવાનો આદેશ કર્યો છે.
આ કેસમાં કોંગ્રેસના ટોચના નેતાઓ સોનિયા ગાંધી અને રાહુલ ગાંધીના નામ પણ પરોક્ષ રીતે જોડાયેલા હતા, કારણ કે AJLની માલિકી ધરાવતી 'યંગ ઈન્ડિયન' કંપનીમાં તેઓ મુખ્ય શેરધારકો છે. હુડ્ડા અને AJLને મળેલી આ મુક્તિ આગામી સમયમાં રાજકીય ગલિયારાઓમાં પણ મોટી ચર્ચા જગાવશે. પૂર્વ મુખ્યમંત્રીના સમર્થકો આને "સત્યની જીત" ગણાવી રહ્યા છે.