વોશિંગ્ટન : અમેરિકા અને ઈરાન વચ્ચે ચાલી રહેલું યુદ્ધ હવે અત્યંત વિનાશક અને ખર્ચાળ વળાંક પર પહોંચી ગયું છે. રાષ્ટ્રપતિ ડોનાલ્ડ ટ્રમ્પ જે તેહરાન પર અમેરિકી વિમાનો મુક્તપણે ઉડી રહ્યા હોવાના દાવા કરતા હતા, તેમને હવે ઈરાને જડબાતોડ જવાબ આપ્યો છે. યુદ્ધના ૩૫માં દિવસે ઈરાને અમેરિકાના બે શક્તિશાળી ફાઈટર જેટ અને એક બ્લેક હોક હેલિકોપ્ટરને તોડી પાડતા વોશિંગ્ટનમાં ખળભળાટ મચી ગયો છે. આ ઘટનાએ સાબિત કરી દીધું છે કે ઈરાનની સૈન્ય શક્તિને 'નાશ' કરવાના ટ્રમ્પના દાવાઓ હજુ વાસ્તવિકતાથી દૂર છે.
ગયા અઠવાડિયે જ ટ્રમ્પે રાષ્ટ્રને સંબોધન કરતા કહ્યું હતું કે અમેરિકા યુદ્ધના તમામ ઉદ્દેશ્યો પૂર્ણ કરી રહ્યું છે અને ઈરાન સંપૂર્ણપણે નબળું પડી ગયું છે. ઇઝરાયલ અને અમેરિકી સંરક્ષણ વિભાગે પણ દાવો કર્યો હતો કે ઈરાનની ૮૦% હવાઈ સંરક્ષણ પ્રણાલી નષ્ટ થઈ ગઈ છે. જોકે, ૩ એપ્રિલની ઘટનાએ આ તમામ દાવાઓને પડકાર્યા છે. ઈરાની ગોળીબારમાં અમેરિકાનું F-15E સ્ટ્રાઈક ઈગલ અને A-10 વોર્થોગ વિમાન ખાડીમાં તૂટી પડ્યા હતા. આ જંગમાં દુશ્મનના ગોળીબારથી અમેરિકી ફાઈટર જેટ તોડી પાડવામાં આવ્યા હોય તેવી આ પ્રથમ ઘટના છે.
પેન્ટાગોન માટે આર્થિક અને સૈન્ય નુકસાનનો આંકડો સતત વધી રહ્યો છે. અત્યાર સુધીમાં ૧૩ અમેરિકી સૈનિકોના મોતની સત્તાવાર પુષ્ટિ થઈ છે, જ્યારે સેંકડો ઘાયલ થયા છે. વિમાનોની વાત કરીએ તો, અમેરિકાએ અત્યાર સુધીમાં અનેક F-35, KC-135 રિફ્યુઅલિંગ એરક્રાફ્ટ અને ૧૨ જેટલા MQ-9 રીપર ડ્રોન ગુમાવ્યા છે. સાઉદી અરેબિયા અને કતારમાં આવેલા અમેરિકી સૈન્ય મથકો પર પણ ઈરાની મિસાઈલોએ ભારે તબાહી મચાવી છે, જેના કારણે પ્રદેશના ૧૩ માંથી અનેક મથકો હવે રહેવા લાયક રહ્યા નથી.
બીજી તરફ, ઈરાનમાં પણ ભારે નુકસાન થયું હોવાના અહેવાલો છે, પરંતુ તેહરાન નમતું મૂકવા કે વાટાઘાટો કરવા તૈયાર હોય તેવું લાગતું નથી. ટ્રમ્પ માટે હવે આ યુદ્ધ ઘરેલુ રાજકારણમાં પણ ગળાનો ફાંસો બની રહ્યું છે, કારણ કે અમેરિકી જનતા લાંબા અને ખર્ચાળ યુદ્ધની વિરુદ્ધમાં છે. ટ્રમ્પ પાસે હજુ સુધી આ યુદ્ધમાંથી બહાર નીકળવાની કોઈ સ્પષ્ટ વ્યૂહરચના (Exit Strategy) દેખાતી નથી, જેને કારણે આગામી દિવસોમાં મધ્ય-પૂર્વમાં તણાવ વધુ ઉગ્ર બનવાની સંભાવના છે.