સિયાલકોટ : ભારત અને પાકિસ્તાન વચ્ચે ચાલી રહેલા ભારે રાજદ્વારી અને લશ્કરી તણાવ વચ્ચે પાકિસ્તાનના સંરક્ષણ પ્રધાન ખ્વાજા આસિફે અત્યંત ઉશ્કેરણીજનક નિવેદન આપ્યું છે. શનિવારે પોતાના વતન સિયાલકોટમાં પત્રકારો સાથે વાત કરતા આસિફે ભારતને સીધી ચેતવણી આપી હતી કે જો ભવિષ્યમાં ભારત તરફથી કોઈ પણ પ્રકારનું લશ્કરી પગલું ભરવામાં આવશે, તો પાકિસ્તાન તેનો જવાબ માત્ર સરહદ પર જ નહીં, પણ ભારતના પૂર્વ છેડે આવેલા કોલકાતા સુધી પહોંચીને આપશે.
ખ્વાજા આસિફે દાવો કર્યો હતો કે ભારત ફરી એકવાર કોઈ 'ફોલ્સ ફ્લેગ ઓપરેશન' (બનાવટી હુમલો) કરવાની યોજના બનાવી રહ્યું છે. તેમણે કોઈ પણ પુરાવા આપ્યા વિના એવો ગંભીર આરોપ લગાવ્યો હતો કે ભારત પોતાના જ માણસો અથવા અટકાયતમાં રહેલા પાકિસ્તાનીઓનો ઉપયોગ કરીને આતંકવાદી હુમલાનું નાટક રચી શકે છે. આસિફે કહ્યું કે, "જો ભારત આ વખતે આવું કોઈ સાહસ કરશે, તો અલ્લાહની મરજીથી અમે આ જંગને કોલકાતા સુધી ખેંચી જઈશું."
સંરક્ષણ પ્રધાનનું આ નિવેદન ભારતના સંરક્ષણ પ્રધાન રાજનાથ સિંહની તાજેતરની ટિપ્પણીના જવાબમાં આવ્યું છે. રાજનાથ સિંહે અગાઉ સ્પષ્ટ શબ્દોમાં ચેતવણી આપી હતી કે જો પાડોશી દેશ તરફથી કોઈ પણ પ્રકારની ઉશ્કેરણીજનક કાર્યવાહી કરવામાં આવશે, તો ભારતનો જવાબ 'અભૂતપૂર્વ અને નિર્ણાયક' હશે. આ જંગ અત્યારે શબ્દોના યુદ્ધમાં ફેરવાઈ ગઈ છે, જ્યાં પાકિસ્તાને હવે ભારતના મહાનગરોને નિશાન બનાવવાની ધમકી આપીને તણાવમાં વધારો કર્યો છે.
નોંધનીય છે કે ગયા વર્ષે ૨૨ એપ્રિલના રોજ પહેલગામમાં થયેલા હુમલા બાદ બંને દેશો વચ્ચે ચાર દિવસ સુધી ભયાનક સંઘર્ષ ચાલ્યો હતો. ત્યારથી સરહદ પર સ્થિતિ નાજુક છે. ખ્વાજા આસિફે ગુરુવારે પણ કહ્યું હતું કે પાકિસ્તાનનો વળતો પ્રહાર 'ઝડપી અને માપાંકિત' હશે. જોકે, આંતરરાષ્ટ્રીય સ્તરે પાકિસ્તાનના આ પ્રકારના ગેરજવાબદાર નિવેદનોની ટીકા થઈ રહી છે, કારણ કે તે પ્રાદેશિક શાંતિ માટે મોટું જોખમ ઊભું કરી રહ્યા છે.