મુંબઈ : મહારાષ્ટ્રના રાજકારણમાં અત્યારે બારામતી વિધાનસભા બેઠકની પેટાચૂંટણી કેન્દ્રસ્થાને છે. ગત ૨૮ જાન્યુઆરીએ એક દુર્ભાગ્યપૂર્ણ વિમાન દુર્ઘટનામાં તત્કાલીન NCP પ્રમુખ અજિત પવારના અકાળે અવસાન બાદ આ બેઠક ખાલી પડી હતી. આ ગંભીર પરિસ્થિતિમાં માનવતા અને રાજકીય શિષ્ટાચારનો દાખલો બેસાડતા મહારાષ્ટ્રના મુખ્યમંત્રી દેવેન્દ્ર ફડણવીસે તમામ રાજકીય પક્ષોને એક વિશેષ અપીલ કરી છે. તેમણે વિનંતી કરી છે કે અજિત પવારના પત્ની અને હાલના નાયબ મુખ્યમંત્રી સુનેત્રા પવારને આ બેઠક પરથી બિનહરીફ ચૂંટવા માટે સૌએ સહયોગ આપવો જોઈએ.
મુખ્યમંત્રી ફડણવીસે ભૂતકાળના ઉદાહરણો ટાંકીને જણાવ્યું હતું કે, જ્યારે દિગ્ગજ નેતા આર.આર. પાટીલનું અવસાન થયું હતું, ત્યારે પણ મહારાષ્ટ્રના તમામ પક્ષોએ ઉદારતા દાખવીને તેમના પત્ની સુમન પાટીલને તાસગાંવ બેઠક પરથી બિનહરીફ ચૂંટ્યા હતા. તેમણે ઉમેર્યું કે, "આપણી રાજકીય પરંપરા રહી છે કે જ્યારે કોઈ નેતાનું અકાળે અવસાન થાય ત્યારે તેમના પરિવારના સભ્ય સામે ચૂંટણી લડવાનું ટાળીને તેમને આદર આપવામાં આવે છે." સુનેત્રા પવાર આગામી ૬ એપ્રિલે પોતાનું ઉમેદવારી ફોર્મ ભરે તેવી શક્યતા છે.
બારામતી એ પવાર પરિવારનો વર્ષો જૂનો ગઢ રહ્યો છે. ૨૦૧૯માં અજિત પવારે અહીં ૧.૬૫ લાખ મતોના જંગી માર્જિનથી જીત મેળવી હતી. જોકે, આ વખતે રાજકીય સમીકરણો થોડા જટિલ છે. શરદ પવારની આગેવાની હેઠળની NCP (SP) એ આ પેટાચૂંટણીમાં ઉમેદવાર ન ઉતારવાની જાહેરાત કરી દીધી છે, જે એક હકારાત્મક સંકેત છે. પરંતુ કોંગ્રેસે હજુ સુધી સ્પષ્ટ કર્યું નથી કે તેઓ આ બેઠક પર સુનેત્રા પવારને બિનહરીફ વિજય અપાવવામાં સાથ આપશે કે નહીં. બારામતી ઉપરાંત અહિલ્યાનગરની રાહુરી બેઠક પર પણ પેટાચૂંટણી યોજાવાની છે, જેના કારણે મહારાષ્ટ્રમાં રાજકીય ગરમાવો જોવા મળી રહ્યો છે.