મેરઠ : ઉત્તર પ્રદેશમાં આતંકવાદ વિરોધી દસ્તા (ATS) એ એક મોટી આતંકી ઘટનાને અંજામ આપે તે પહેલા જ ભયાનક ષડયંત્રનો પર્દાફાશ કર્યો છે. મેરઠના રહેવાસી અને હાલ દુબઈમાં સ્થાયી થયેલા આકિબ નામના શખ્સે સોશિયલ મીડિયાના માધ્યમથી પાકિસ્તાની હેન્ડલર્સ સાથે મળીને ભારતમાં આતંકી મોડ્યુલ તૈયાર કર્યું હોવાનું બહાર આવ્યું છે. તપાસમાં ખુલાસો થયો છે કે આકિબ ઇન્સ્ટાગ્રામ અને ટેલિગ્રામ દ્વારા સ્થાનિક યુવાનોને ઉશ્કેરીને તેમને રાષ્ટ્રવિરોધી પ્રવૃત્તિઓ માટે તૈયાર કરતો હતો. આ ટોળકી રાજધાની લખનૌના મુખ્ય રેલ્વે સ્ટેશન પર મોટા પાયે વિસ્ફોટ કરવાની યોજના સાથે ત્યાં પહોંચી હતી, પરંતુ એટીએસની સતર્કતાને કારણે લોહીની નદીઓ વહે તે પહેલા જ ચાર આતંકીઓને દબોચી લેવામાં આવ્યા છે.

એટીએસ દ્વારા ધરપકડ કરાયેલા આરોપીઓમાં સાકિબ ઉર્ફે ડેવિલ, અરબાબ, વિકાસ અને લોકેશ ઉર્ફે પાપલા પંડિતનો સમાવેશ થાય છે. એડીજી લો એન્ડ ઓર્ડર અમિતાભ યશે જણાવ્યું હતું કે મુખ્ય સૂત્રધાર આકિબ દુબઈમાં રહીને પાકિસ્તાની આતંકી સંગઠનોના વરિષ્ઠ હેન્ડલર્સ સાથે સીધો સંપર્ક ધરાવે છે. આકિબની સોશિયલ મીડિયા પ્રોફાઇલ પર તે AK-47 જેવા આધુનિક હથિયારો સાથે જોવા મળ્યો હતો, જે તેના આતંકી કનેક્શનની પુષ્ટિ કરે છે. આકિબ સામે એફઆઈઆર નોંધીને હવે તેની આસપાસનો ગાળિયો વધુ મજબૂત કરવામાં આવી રહ્યો છે. તપાસ એજન્સીઓ એ પણ શોધી રહી છે કે દેશમાં અન્ય કઈ જગ્યાએ આ પ્રકારના 'સ્લીપર સેલ્સ' સક્રિય કરવામાં આવ્યા છે.

શનિવારે આ તમામ આરોપીઓને કોર્ટમાં રજૂ કરવામાં આવ્યા હતા, જ્યાં કોર્ટે પાંચ દિવસના એટીએસ રિમાન્ડ મંજૂર કર્યા છે. આગામી દિવસોમાં આ પૂછપરછ દરમિયાન અનેક ચોંકાવનારા રહસ્યો સામે આવવાની શક્યતા છે. એટીએસની ટીમ એ જાણવાનો પ્રયાસ કરી રહી છે કે આ મોડ્યુલને ફંડિંગ ક્યાંથી મળતું હતું અને લખનૌ સિવાય અન્ય કયા શહેરો તેમના નિશાના પર હતા. આકિબના સંપર્કમાં આવેલા અન્ય શંકાસ્પદ લોકોની શોધખોળ પણ તેજ કરી દેવામાં આવી છે. ઉત્તર પ્રદેશ પોલીસ અને ગુપ્તચર એજન્સીઓ હાલ હાઈ એલર્ટ પર છે જેથી કોઈ પણ અનિચ્છનીય ઘટનાને ટાળી શકાય.