તેહરાન: મધ્ય પૂર્વમાં ચાલી રહેલું યુદ્ધ હવે તેના સૌથી ભયાનક તબક્કે પહોંચી ગયું છે. રવિવાર, 5 એપ્રિલના રોજ અમેરિકાએ ઈરાન વિરુદ્ધ તેની સૌથી ઘાતક અને લાંબા અંતરની સ્ટેલ્થ ક્રૂઝ મિસાઈલ 'JASSM-ER' (જાસ્મ-ઈઆર) ના ભંડાર ખોલી નાખ્યા છે. આ મિસાઈલની સૌથી મોટી ખાસિયત તેની અદ્રશ્ય રહેવાની ક્ષમતા છે; દુશ્મન દેશના અત્યાધુનિક રડાર પણ તેને પકડી શકતા નથી. આશરે 12.5 કરોડ રૂપિયાની એક યુનિટ કિંમત ધરાવતી આ મિસાઈલ 600 માઈલથી વધુ દૂર બેસીને દુશ્મનના સૈન્ય મથકોને તબાહ કરી શકે છે. અમેરિકાએ પ્રશાંત મહાસાગરના તેના બેઝ પરથી આ મિસાઈલોનો મોટો જથ્થો ઈરાન તરફ રવાના કરી દીધો છે, જે સૂચવે છે કે આગામી કલાકો તેહરાન માટે અત્યંત ભારે સાબિત થઈ શકે છે.

યુદ્ધના મેદાનમાં અમેરિકાની આક્રમકતાનો અંદાજ એ વાત પરથી લગાવી શકાય છે કે ઈરાન સાથે સંઘર્ષ શરૂ થયાના માત્ર ચાર સપ્તાહમાં જ યુએસ સૈન્યએ 1000 થી વધુ 'JASSM-ER' મિસાઈલો દાગી દીધી છે. આ મિસાઈલ પાયલોટ અને ફાઈટર જેટ્સને જોખમમાં નાખ્યા વિના દુશ્મન દેશના એર ડિફેન્સને તોડી પાડવા માટે બનાવવામાં આવી છે. જોકે, આ આક્રમક વ્યૂહરચના વચ્ચે અમેરિકાના પોતાના હથિયારોના ભંડારમાં પણ મોટો ઘટાડો નોંધાયો છે. યુદ્ધ પૂર્વે અમેરિકા પાસે અંદાજે 23,000 મિસાઈલો હતી, જે હવે ઘટીને માત્ર 425 જેટલી જ મર્યાદિત રહી હોવાના અહેવાલો છે. વર્તમાન પ્રોડક્શન રેટ જોતા આ ખાલી થયેલા ભંડારને ફરી ભરતા વર્ષોનો સમય લાગી શકે તેમ છે, જે ચીન જેવા અન્ય હરીફ દેશો સાથેના સંભવિત સંઘર્ષ માટે ચિંતાનો વિષય છે.

બીજી તરફ, ઈરાન પણ અમેરિકાની આ હાઈટેક હવાઈ તાકાત સામે જોરદાર વળતો પ્રહાર કરી રહ્યું છે. અમેરિકા અને ઈઝરાયેલ ભલે ઈરાની એર ડિફેન્સ સિસ્ટમને નષ્ટ કરવાનો દાવો કરતા હોય, પરંતુ જમીની હકીકત અલગ જ નજરે પડી રહી છે. તાજેતરમાં જ ઈરાને અમેરિકાના ગૌરવ સમાન F-15E સ્ટ્રાઈક ફાઈટર જેટને તોડી પાડ્યું છે, એટલું જ નહીં પરંતુ રેસ્ક્યૂ માટે મોકલવામાં આવેલા હેલિકોપ્ટરો અને 12 થી વધુ MQ-9 રીપર ડ્રોનને પણ ઈરાની સેનાએ નષ્ટ કર્યા હોવાના સમાચાર છે. ઈરાન પાસે રહેલા શાહેદ ડ્રોન અને બેલેસ્ટિક મિસાઈલોના આક્રમણને ખાળવા માટે અમેરિકાને હજારોની સંખ્યામાં પેટ્રિયટ અને થાડ ઇન્ટરસેપ્ટર મિસાઈલોની જરૂર પડી રહી છે. પશ્ચિમ એશિયાનું આ રણમેદાન હવે માત્ર સૈનિકોની લડાઈ નહીં, પરંતુ વિશ્વની સૌથી આધુનિક મિસાઈલ ટેકનોલોજીના પરીક્ષણનું કેન્દ્ર બની ગયું છે.