ચેન્નઈ: તમિલનાડુની રાજનીતિમાં એન્ટ્રી કરનાર લોકપ્રિય અભિનેતા અને 'તમિલગ વેત્રી કઝગમ' (TVK) ના પ્રમુખ વિજયે પોતાના તાજા ચૂંટણી હલફનામામાં ગંભીર વિગતો જાહેર કરતા રાજકીય ગરમાવો આવી ગયો છે. અગાઉ દાખલ કરેલા હલફનામામાં કોઈ પણ કેસનો ઉલ્લેખ ન કરનાર વિજયે હવે 4 એપ્રિલના રોજ રજૂ કરેલા નવા દસ્તાવેજોમાં બે પેન્ડિંગ એફઆઈઆરની કબૂલાત કરી છે. જેમાં પ્રથમ કેસ ચેન્નઈના પેરાવલ્લૂર પોલીસ સ્ટેશનમાં ચૂંટણી પ્રચાર દરમિયાન જાહેર અવ્યવસ્થા ફેલાવવા બદલ નોંધાયો છે, જ્યારે બીજી ફરિયાદ મદુરાઈના કૂડાકોવિલ સ્ટેશનમાં નોંધાયેલી છે. આ ફરિયાદમાં આરોપ છે કે ઓગસ્ટ 2025માં યોજાયેલી પાર્ટી કોન્ફરન્સ દરમિયાન વિજયના બાઉન્સરોએ એક વ્યક્તિને માર માર્યો હતો. વિજયે રિટર્નિંગ ઓફિસર સમક્ષ આ પૂરક દસ્તાવેજો રજૂ કરીને ચૂંટણી પંચના નિયમોનું પાલન કરવાનો પ્રયાસ કર્યો છે.

ગુનાહિત કેસોની સાથે વિજયની અઢળક સંપત્તિનો આંકડો પણ સામે આવ્યો છે, જે સોશિયલ મીડિયા પર ચર્ચાનો વિષય બન્યો છે. નવા હલફનામા અનુસાર, વિજય પાસે અંદાજે 410.59 કરોડ રૂપિયાની જંગમ મિલકત છે, જેમાં કિંમતી સોના-ચાંદીના આભૂષણોનો પણ સમાવેશ થાય છે. આ ઉપરાંત, નીલંકરઈ અને સાલીગ્રામમ જેવા પોશ વિસ્તારોમાં આવેલા મકાનો અને વ્યાવસાયિક ઇમારતો સહિતની સ્થાવર મિલકતની કિંમત 220.15 કરોડ રૂપિયા આંકવામાં આવી છે. આમ, વિજય કુલ 630 કરોડથી વધુની સંપત્તિના માલિક છે. નાણાકીય વર્ષ 2024-25 માટે તેમણે પોતાની કુલ વાર્ષિક આવક 184.53 કરોડ રૂપિયા જાહેર કરી છે, જે તેમની સ્ટાર પાવર અને વ્યાવસાયિક સફળતાનો પુરાવો આપે છે.

મહત્વની વાત એ છે કે, વિજયે હલફનામામાં 3.44 કરોડ રૂપિયાના આવકવેરાના બાકી લેણાંનો પણ ઉલ્લેખ કર્યો છે, જે હાલમાં અપીલ હેઠળ છે. ટીવીકે પ્રમુખ આ વખતે પેરામ્બુર અને તિરુચિરાપલ્લી ઈસ્ટ એમ બે બેઠકો પરથી ચૂંટણી લડી રહ્યા છે, જેને લઈને તેમણે 30 માર્ચ અને 2 એપ્રિલના રોજ નામાંકન પત્ર ભર્યા હતા. શરૂઆતના ફોર્મ અને નવા હલફનામા વચ્ચેની વિસંગતિઓ દૂર કરવા માટે આ વધારાનો દસ્તાવેજ રજૂ કરવામાં આવ્યો છે. તમિલનાડુમાં ચૂંટણીનો જંગ જામ્યો છે ત્યારે સુપરસ્ટાર વિજયની આ અંગત અને આર્થિક વિગતો મતદારોના મન પર કેવી અસર કરશે તે જોવું રસપ્રદ રહેશે. વિરોધ પક્ષોએ પહેલેથી જ કેસો છુપાવવાના મુદ્દે વિજયને ઘેરવાનું શરૂ કરી દીધું છે.