કેરળના એર્નાકુલમમાં એક જાહેર રેલીને સંબોધતા, કેન્દ્રીય ગૃહમંત્રી અમિતભાઈ  શાહે LDF સરકાર પર આકરા પ્રહારો કર્યા. તેમણે કહ્યું કે કેરળના લોકો હવે LDFના કુશાસનમાંથી પરિવર્તન ઇચ્છે છે અને લાંબા સમયથી ચાલતા સત્તાના ચક્રમાંથી મુક્ત થવા માંગે છે. અમિતભાઈ  શાહે કહ્યું કે ભારતીય જનતા પાર્ટીની નીતિ ખૂબ જ સ્પષ્ટ છે: બધા માટે ન્યાય, કોઈના માટે તુષ્ટિકરણ નહીં. આ સિદ્ધાંતના આધારે દેશભરમાં કાર્ય થઈ રહ્યું છે. કેરળમાં પણ આ જ અભિગમ લાગુ કરવામાં આવશે . તેમણે પોતાના સંબોધનમાં પોપ્યુલર ફ્રન્ટ ઓફ ઈન્ડિયાનો પણ ઉલ્લેખ કર્યો.

કેન્દ્રીય ગૃહમંત્રીએ કહ્યું કે જ્યારે પીએફઆઈ રાષ્ટ્રવિરોધી પ્રવૃત્તિઓમાં સામેલ હોવાનું જાણવા મળ્યું, ત્યારે કેન્દ્ર સરકારે એક જ દિવસમાં દેશભરમાં તેના તમામ કાર્યકરોની ધરપકડ કરી જેલમાં ધકેલી દીધા. આ કાર્યવાહી એ વાતનો પુરાવો છે કે દેશની સુરક્ષા સાથે કોઈપણ કિંમતે સમાધાન કરવામાં આવશે નહીં. અમિતભાઈ  શાહે પોતાના ભાષણમાં વક્ફ સુધારા બિલનો મુદ્દો પણ મુખ્ય રીતે ઉઠાવ્યો. તેમણે આરોપ લગાવ્યો કે એર્નાકુલમમાં વક્ફ બોર્ડે આશરે 400 એકર જમીન પર કબજો કરી લીધો છે જે અગાઉ લગભગ 600 હિન્દુ અને ખ્રિસ્તી પરિવારોની હતી. આ મુદ્દા પર સંસદમાં પણ ચર્ચા થઈ હતી. જ્યારે સંસદમાં આ મુદ્દા પર ચર્ચા થઈ રહી હતી, ત્યારે LDF અને UDF એ આ પરિવારોના સમર્થનમાં કોઈ વાત કરી ન હતી. આ સ્પષ્ટપણે આ પક્ષોની પ્રાથમિકતાઓ દર્શાવે છે. તેમણે કેરળમાં NDA માટે વધતા સમર્થનનો ઉલ્લેખ કરતા કહ્યું કે વધતો મત હિસ્સો આનો પુરાવો છે.

કેરળમાં કેન્દ્રીય ગૃહમંત્રી અમિતભાઈ  શાહે કહ્યું કે 2024માં NDAને ૧૪ ટકા મત મળ્યા હતા, જે ૨૦૧૯માં વધીને ૧૬ ટકા અને ૨૦૨૪માં ૨૦ ટકા થયા. આ વધતો જતો ટેકો દર્શાવે છે કે કેરળમાં NDA સરકારનો સમય આવી ગયો છે. તેમણે LDF અને UDF બંને પર નિશાન સાધ્યું. ચૂંટણી રેલીમાં પોતાના સંબોધનના અંતે અમિતભાઈ શાહે કહ્યું કે આ ચૂંટણી ફક્ત સરકાર બદલવાની નથી. તેમણે તેને કેરળના ભવિષ્ય માટેની ચૂંટણી ગણાવી. તેમણે લોકોને અપીલ કરી કે જો તેઓ વાસ્તવિક વિકાસ ઇચ્છતા હોય, તો તેમણે નરેન્દ્રભાઈ  મોદીના નેતૃત્વ હેઠળના NDAને સરકાર બનાવવાની તક આપવી જોઈએ.