દુબઈ: પશ્ચિમ એશિયામાં વધી રહેલા તણાવ વચ્ચે ઈરાન દ્વારા સંયુક્ત આરબ અમીરાત (UAE) પર રવિવારે વધુ એક મોટો હુમલો કરવામાં આવ્યો છે. જોકે, અમીરાતના મજબૂત એર ડિફેન્સ તંત્રએ ઈરાન તરફથી છોડવામાં આવેલી 9 બેલેસ્ટિક મિસાઈલ, 1 ક્રૂઝ મિસાઈલ અને 50 જેટલા ડ્રોનને હવામાં જ આંતરીને તોડી પાડ્યા છે. આ હુમલા બાદ યુએઈનું સંરક્ષણ મંત્રાલય સંપૂર્ણ સજ્જ અને હાઈ એલર્ટ મોડ પર આવી ગયું છે.
હુમલાની તીવ્રતા અને અત્યાર સુધીનું નુકસાન
સંરક્ષણ મંત્રાલય દ્વારા જાહેર કરવામાં આવેલી વિગતો અનુસાર, રવિવારે થયેલા તાજા હુમલામાં સદનસીબે કોઈ નવી જાનહાનિના સમાચાર નથી. પરંતુ, ઈરાન દ્વારા શરૂ કરવામાં આવેલા આ શ્રેણીબદ્ધ હુમલાઓમાં અત્યાર સુધીમાં કુલ 2 સૈનિકો શહીદ થયા છે અને સશસ્ત્ર દળો સાથે કરારબદ્ધ એક મોરોક્કન નાગરિકનું પણ મોત નીપજ્યું છે. આ ઉપરાંત, હુમલાની લપેટમાં આવતા ભારત, પાકિસ્તાન, નેપાળ, બાંગ્લાદેશ, પેલેસ્ટાઈન અને ઈજિપ્તના મળીને કુલ 10 સામાન્ય નાગરિકોએ જીવ ગુમાવ્યા છે.
ઈજાગ્રસ્તોમાં વિવિધ દેશોના નાગરિકો સામેલ
ઈરાની હુમલાઓની શરૂઆતથી અત્યાર સુધીમાં ઈજાગ્રસ્તોનો કુલ આંકડો 217 પર પહોંચી ગયો છે. આ ઘાયલોમાં અમીરાત ઉપરાંત ઈજિપ્ત, સુદાન, ઇથોપિયા, ફિલિપાઈન્સ, પાકિસ્તાન, ઈરાન, ભારત, શ્રીલંકા, તુર્કી, રશિયા અને સ્વીડન સહિત અનેક દેશોના નાગરિકોનો સમાવેશ થાય છે. આ આંકડા દર્શાવે છે કે ઈરાનના આ હુમલાઓની અસર માત્ર સ્થાનિક સ્તરે જ નહીં પરંતુ ત્યાં વસતા આંતરરાષ્ટ્રીય સમુદાય પર પણ પડી રહી છે.
સંરક્ષણ મંત્રાલયની કડક ચેતવણી
યુએઈના સંરક્ષણ મંત્રાલયે સ્પષ્ટ શબ્દોમાં જણાવ્યું છે કે તેઓ કોઈપણ પ્રકારના ખતરાને પહોંચી વળવા માટે સંપૂર્ણ સજ્જ છે. દેશની સુરક્ષા, સાર્વભૌમત્વ અને સ્થિરતાને નુકસાન પહોંચાડવાના કોઈપણ પ્રયાસનો મક્કમતાથી સામનો કરવામાં આવશે. અત્યાર સુધીના સંઘર્ષમાં અમીરાતના એર ડિફેન્સે અદભૂત કામગીરી કરતા કુલ 507 બેલેસ્ટિક મિસાઈલ, 24 ક્રૂઝ મિસાઈલ અને 2,191 ડ્રોનને તોડી પાડીને મોટી જાનહાનિ ટાળી છે. હાલમાં સમગ્ર અમીરાતમાં કડક સુરક્ષા બંદોબસ્ત ગોઠવી દેવામાં આવ્યો છે.