ટ્રમ્પની ધમકીથી ક્રૂડ ઓઇલના ભાવ આસમાનેઃ ૧૧૦ ડોલરને પાર
હોર્મુઝની કટોકટી વધુ ઘેરી બનીઃ ગ્લોબલ ઓઈલ માર્કેટમાં ભડકો
નવી દિલ્હી, તા.૬: અમેરિકી રાષ્ટ્રપતિ ડોનાલ્ડ ટ્રમ્પની તાજેતરની આક્રમક ચેતવણીએ વૈશ્વિક ઊર્જા બજારમાં ખળભળાટ મચાવી દીધો છે. ટ્રમ્પે ઈરાનને સીધી ધમકી આપી છે કે જો હોર્મુઝ સ્ટ્રેટનો માર્ગ ખોલવામાં નહીં આવે, તો તેના નાગરિક અને ઊર્જા માળખાને નેસ્તનાબૂદ કરવામાં આવશે. આ નિવેદન બાદ આંતરરાષ્ટ્રીય બજારમાં ક્રૂડ ઓઈલના ભાવમાં જોરદાર ઉછાળો જોવા મળ્યો છે અને બ્રેન્ટ ક્રૂડ $૧૧૦.૬૦ પ્રતિ બેરલની સપાટીને વટાવી ગયું છે. હોર્મુઝ સ્ટ્રેટ વિશ્વના કુલ તેલ પુરવઠાના લગભગ ૨૦% હિસ્સાનું વહન કરે છે, તેથી આ રસ્તો બ્લોક થવાની ભીતિએ રોકાણકારો અને ગ્રાહક દેશોમાં ભારે ગભરાટ ફેલાવ્યો છે.
પﾍમિ એશિયામાં વધી રહેલા તણાવને કારણે સાઉદી અરેબિયા, ઈરાક અને કુવૈત જેવા મોટા તેલ નિકાસકાર દેશોની સપ્લાય ચેઈન જોખમમાં મુકાઈ છે. બીજી તરફ, OPEC+ દેશોએ ઉત્પાદન વધારવાની વાત તો કરી છે, પરંતુ યુદ્ધના કારણે નુકસાન પામેલી ઊર્જા સુવિધાઓનું તાત્કાલિક સમારકામ કરવું ટેકનિકલ અને આર્થિક રીતે અત્યંત પડકારજનક છે. બજારના વિશ્લેષકો માને છે કે જો ટ્રમ્પ તેમની ધમકી મુજબ ઈરાની ઓઈલ ફિલ્ડ્સ પર હુમલો કરશે, તો તેલનો પુરવઠો સાવ ઠપ્પ થઈ શકે છે. પાછલા કેટલાક સત્રોમાં તેલના ભાવમાં થયેલો ૮% થી ૧૧% નો વધારો એ સંકેત આપે છે કે આગામી દિવસોમાં સ્થિતિ વધુ વણસી શકે છે.
આ સંકટની સૌથી મોટી અસર ભારત જેવા વિકાસશીલ દેશો પર પડી શકે છે, જેઓ પોતાની જરૂરિયાતનું મોટાભાગનું ક્રૂડ આયાત કરે છે. જો તેલના ભાવ $૧૧૫ ની ઉપર સ્થિર થશે, તો તેની સીધી અસર મોંઘવારી પર પડશે, જેનાથી સામાન્ય માણસના ખિસ્સા પર પેટ્રોલ અને ડીઝલનો બોજ વધશે. રશિયા-યુક્રેન યુદ્ધ બાદ તેલના પુરવઠામાં પહેલેથી જ વિક્ષેપ હતો, અને હવે ટ્રમ્પની આ ધમકીએ બળતામાં ઘી હોમવાનું કામ કર્યું છે. હાલમાં આખી દુનિયાની નજર આ વ્યૂહાત્મક દરિયાઈ માર્ગ પર છે, કારણ કે ત્યાં થતી એક પણ હિલચાલ વૈશ્વિક અર્થતંત્રના સમીકરણો બદલી શકે છે.
(11:22 AM IST)
છેલ્લા 8 દિવસમાં સૌથી લોકપ્રિય 
