નવી દિલ્હી: ભારતીય જનતા પાર્ટીના સ્થાપના દિવસ નિમિત્તે વડાપ્રધાન નરેન્દ્રભાઈ મોદી સહિતના ટોચના નેતાઓએ પક્ષના લાખો કાર્યકરોને શુભકામનાઓ પાઠવી છે. સોશિયલ મીડિયા પ્લેટફોર્મ પર સંદેશ પાઠવતા વડાપ્રધાન નરેન્દ્રભાઈ મોદીએ કાર્યકરોની મહેનત અને સમર્પણની પ્રશંસા કરતા જણાવ્યું કે, દ્રઢ સંકલ્પ દરેક પડકારને સરળ બનાવી દે છે. તેમણે ‘ઈન્ડિયા ફર્સ્ટ’ના સિદ્ધાંત અને સેવા ભાવને ભાજપની સાચી ઓળખ ગણાવી હતી.

નેતાઓએ વ્યક્ત કર્યો રાષ્ટ્ર પુનઃનિર્માણનો સંકલ્પ:
ગૃહમંત્રી અમિતભાઈ શાહે ભાજપની સ્થાપનાને માત્ર રાજકીય ઘટના નહીં પરંતુ રાષ્ટ્ર પુનઃનિર્માણનો સંકલ્પ ગણાવ્યો હતો. તેમણે ‘સબકા સાથ, સબકા વિકાસ અને સબકા વિશ્વાસ’ને પાર્ટીની મુખ્ય ઉપલબ્ધિ ગણાવી હતી. ઉત્તર પ્રદેશના મુખ્યમંત્રી યોગી આદિત્યનાથે ભાજપને વિશ્વનો સૌથી મોટો રાજકીય પક્ષ ગણાવતા તેને સેવા, સંસ્કાર અને સમર્પણ પર આધારિત વિચારધારા વાળો સંગઠન ગણાવ્યો હતો. રાષ્ટ્રીય અધ્યક્ષ નિતિન નબીને પણ આ યાત્રાને અસંખ્ય કાર્યકરોની ત્યાગ અને તપસ્યાની વાર્તા ગણાવી હતી.

ઐતિહાસિક પ્રવાસ - જનસંઘથી ભાજપ સુધી:
ભાજપની સ્થાપના 6 એપ્રિલ 1980ના રોજ થઈ હતી, પરંતુ તેના મૂળ 1951માં શ્યામા પ્રસાદ મુખર્જી દ્વારા સ્થાપિત ભારતીય જનસંઘમાં જોડાયેલા છે. પંડિત દીનદયાળ ઉપાધ્યાયે આપેલો ‘અંત્યોદય’નો સિદ્ધાંત આજે પણ પક્ષની નીતિનો મુખ્ય આધાર છે. 1975માં કટોકટી દરમિયાન જનસંઘ અન્ય પક્ષો સાથે મળીને જનતા પાર્ટીમાં ભળી ગયો હતો, પરંતુ વૈચારિક મતભેદોને કારણે 1980માં ગઠબંધન તૂટતા ભાજપનું ગઠન કરવામાં આવ્યું હતું.

સંઘર્ષથી લઈને સત્તાના શિખર સુધી
1984ની લોકસભા ચૂંટણીમાં ભાજપને માત્ર 2 બેઠકો મળી હતી, પરંતુ રામ જન્મભૂમિ આંદોલન બાદ પક્ષની લોકપ્રિયતામાં મોટો ઉછાળો આવ્યો હતો. 1989માં 80થી વધુ બેઠકો અને 1996માં 161 બેઠકો સાથે ભાજપ સૌથી મોટો પક્ષ બન્યો હતો. અટલ બિહારી વાજપેયીના નેતૃત્વમાં 1999માં ભાજપે કેન્દ્રમાં પ્રથમવાર પૂર્ણ કાર્યકાળવાળી સરકાર બનાવી હતી. આજે વડાપ્રધાન નરેન્દ્રભાઈ મોદીના નેતૃત્વમાં ભાજપ વિશ્વના સૌથી મોટા રાજકીય સંગઠન તરીકે ઉભરી આવ્યું છે અને ‘વિકસિત ભારત’ના લક્ષ્ય સાથે આગળ વધી રહ્યું છે. 47 વર્ષની આ સફરમાં ભાજપે એક નાના સંગઠનથી લઈને દેશના સૌથી પ્રભાવશાળી પક્ષ બનવા સુધીની મંજિલ તય કરી છે.