કુઆલાલમ્પુર, તા.6: વિદેશ પ્રવાસનું આયોજન કરતા બજેટ મુસાફરો માટે ચિંતાજનક સમાચાર સામે આવ્યા છે. મધ્ય પૂર્વમાં ચાલી રહેલા સંઘર્ષને કારણે આંતરરાષ્ટ્રીય બજારમાં ક્રૂડ ઓઈલ (કાચા તેલ) ના ભાવમાં થયેલા તોતિંગ વધારાને પગલે પ્રખ્યાત બજેટ એરલાઇન એરએશિયા એક્સ (AirAsia X) એ ટિકિટના ભાડા વધારવાની જાહેરાત કરી છે. એરલાઇને સ્પષ્ટ કર્યું છે કે વધતા ઈંધણ ખર્ચના સંચાલન માટે આ નિર્ણય અનિવાર્ય બન્યો છે.
ટિકિટ મોંઘી અને ફ્લાઈટ્સ ઓછી થશે
એરએશિયા એક્સના સહ-સ્થાપક ટોની ફર્નાન્ડિઝે સોમવારે એક પ્રેસ કોન્ફરન્સમાં જણાવ્યું હતું કે, તેલના ભાવ વધવાથી ઓપરેશનલ ખર્ચમાં મોટો ઉછાળો આવ્યો છે. જે રૂટ પર ઈંધણનો ખર્ચ ટિકિટની આવક કરતા વધી રહ્યો છે, ત્યાં ફ્લાઈટ્સની સંખ્યામાં ઘટાડો (Capacity Cut) કરવામાં આવશે. આનો અર્થ એ થયો કે આગામી દિવસોમાં કેટલીક મનપસંદ મુસાફરી સ્થળો માટે ફ્લાઈટ્સ મળવી મુશ્કેલ બની શકે છે અને જે ઉપલબ્ધ હશે તેના ભાવ પણ ઉંચા રહેશે.
માંગ હજુ પણ મજબૂત
ભાડામાં વધારાની આશંકા હોવા છતાં, એરલાઇને નોંધ્યું છે કે પ્રવાસીઓમાં હવાઈ મુસાફરીની માંગ હજુ પણ ઘણી ઊંચી છે. પ્રવાસીઓ રજાઓ ગાળવા અને કામકાજ અર્થે વિદેશ જવા માટે ઉત્સુક છે. ટોની ફર્નાન્ડિઝે આશાવાદ વ્યક્ત કર્યો હતો કે વધેલા ભાવ છતાં મુસાફરોનો ધસારો જળવાઈ રહેશે.
નવા હબ માટેની તૈયારીઓ યથાવત
ભલે વર્તમાન પરિસ્થિતિ પડકારજનક હોય, પરંતુ એરએશિયા એક્સે તેના લાંબા ગાળાના પ્રોજેક્ટ્સ અટકાવ્યા નથી. એરલાઇન બહેરીનમાં તેના નવા પ્લાન્ડ હબ માટે પ્રતિબદ્ધ છે. આ હબથી પ્રથમ ફ્લાઇટ આગામી 26 જૂને ઉડાન ભરવા માટે સુનિશ્ચિત છે. કંપની મધ્ય પૂર્વ અને પશ્ચિમના દેશો વચ્ચે કનેક્ટિવિટી વધારવા પર ભાર મૂકી રહી છે.
જો તમે પણ આગામી મહિનાઓમાં વિદેશ જવાનું વિચારી રહ્યા હોવ, તો એરલાઇન્સ દ્વારા લેવામાં આવતા આ નિર્ણયો તમારી ટ્રાવેલ બજેટ પર મોટી અસર પાડી શકે છે. નિષ્ણાતોની સલાહ છે કે ભાવ હજુ વધુ વધે તે પહેલાં વહેલી તકે બુકિંગ કરી લેવું હિતાવહ છે.