નવી દિલ્હી, તા.૬: દેશની રાજધાની દિલ્હીના હૃદય સમાન ગણાતા વિધાનસભા સંકુલમાં સોમવારે બપોરે ૨ વાગ્યે એક એવી ઘટના બની જેણે સુરક્ષા એજન્સીઓના હોશ ઉડાવી દીધા છે. એક અજાણ્યા માસ્કધારી શખ્સે પોતાની સફેદ રંગની સિયાઝ કાર વડે વિધાનસભાના મજબૂત લોખંડના દરવાજા તોડી નાખ્યા હતા. આ શખ્સ માત્ર અંદર ઘૂસ્યો જ નહીં, પણ સ્પીકર વિજેન્દ્ર ગુપ્તાના કાર્યાલય સુધી પહોંચીને એક વિચિત્ર હરકત કરીને નાસી છૂટવામાં સફળ રહ્યો હતો.
ગુલદસ્તો અને શાહીનો રહસ્યમય ખેલ
પ્રત્યક્ષદર્શીઓ અને સચિવાલયના અધિકારીઓના જણાવ્યા અનુસાર, ડ્રાઈવરે અત્યંત ઝડપથી કાર ચલાવીને સ્પીકર વિજેન્દ્ર ગુપ્તાના કાર્યાલય પાસે લાવી ઉભી રાખી હતી. ત્યાં તેણે મંડપ પાસે ફૂલોનો એક ગુલદસ્તો મૂક્યો હતો. એટલું જ નહીં, આ શખ્સે સ્પીકરના વાહન પર શાહી પણ ફેંકી હતી. આ વિચિત્ર હરકત પાછળનો હેતુ શું હતો તે હજુ સ્પષ્ટ થયું નથી, પરંતુ આટલી કડક સુરક્ષા વચ્ચે તે વ્યક્તિ ભાગી છૂટવામાં સફળ રહ્યો તે સૌથી મોટો પ્રશ્ન છે.
બોમ્બ સ્ક્વોડ દ્વારા સર્ચ ઓપરેશન
તાજેતરમાં જ પૂર્ણ થયેલા બજેટ સત્ર દરમિયાન દિલ્હી વિધાનસભાને બોમ્બથી ઉડાવી દેવાની ધમકીઓ મળી હતી, જેને પગલે આ ઘટના બાદ તુરંત જ બોમ્બ ડિસ્પોઝલ સ્ક્વોડને બોલાવવામાં આવી હતી. અધિકારીઓએ તપાસ કરી હતી કે પેલા ગુલદસ્તામાં કોઈ વિસ્ફોટક તો નથી ને? જોકે, સદનસીબે અત્યાર સુધી કોઈ શંકાસ્પદ વસ્તુ મળી આવી નથી. તેમ છતાં, સમગ્ર સંકુલમાં સર્ચ ઓપરેશન જારી રાખવામાં આવ્યું છે.
યુપી કનેક્શન અને સીસીટીવી તપાસ
ઘટનામાં વપરાયેલી સફેદ સિયાઝ કાર ઉત્તર પ્રદેશના રજિસ્ટ્રેશન નંબર (UP) ધરાવતી હોવાનું સામે આવ્યું છે. દિલ્હી પોલીસે હવે વિધાનસભા સંકુલ અને તેની આસપાસના રસ્તાઓના સીસીટીવી ફૂટેજ કબજે કર્યા છે. આ ફૂટેજના આધારે ડ્રાઈવરની ઓળખ કરવાના પ્રયાસો તેજ કરવામાં આવ્યા છે.
સુરક્ષા વ્યવસ્થા પર ઉઠ્યા સવાલો
લોકશાહીના મંદિર સમાન ગણાતી વિધાનસભામાં ગેટ તોડીને અંદર સુધી કોઈ કાર ઘૂસી જાય અને વ્યક્તિ ભાગી પણ જાય, તે સુરક્ષામાં રહેલી મોટી ખામી દર્શાવે છે. હવે સત્તાવાળાઓ દ્વારા એન્ટ્રી પોઈન્ટ્સ પર સુરક્ષા વધુ કડક કરવાની અને ઈમરજન્સી પ્રોટોકોલની સમીક્ષા કરવાની તૈયારીઓ શરૂ કરી દેવામાં આવી છે.
રાજધાનીમાં બનેલી આ ઘટનાએ ફરી એકવાર વીવીઆઈપી ઝોનની સુરક્ષા સામે લાલબત્તી ધરી છે. પોલીસ હવે એ દિશામાં પણ તપાસ કરી રહી છે કે શું આ કોઈ વિરોધ પ્રદર્શનનો ભાગ હતો કે પછી કોઈ મોટું કાવતરું?