તેહરાન : પશ્ચિમ એશિયામાં ચાલી રહેલું ભીષણ યુદ્ધ હવે જાસૂસી અને પરમાણુ રાજનીતિના નવા સ્તરે પહોંચ્યું છે. ઇરાનના વિદેશ મંત્રાલયે એક ચોંકાવનારો દાવો કર્યો છે કે ઇસ્ફહાનમાં અમેરિકાનું કથિત 'રેસ્ક્યૂ મિશન' પાયલોટને બચાવવા માટે નહીં, પરંતુ ઇરાનના અત્યંત સમૃદ્ધ યુરેનિયમનો જથ્થો ચોરી કરવા માટેનું એક સુનિયોજિત કાવતરું હતું. ઇરાને સ્પષ્ટ કર્યું છે કે તે અમેરિકાના કોઈપણ 'માનવતાવાદી બહાના'માં ફસાશે નહીં. તેહરાને 45 દિવસના યુદ્ધવિરામના પ્રસ્તાવને ફગાવી દેતા તર્ક આપ્યો છે કે આવા ટૂંકા ગાળાના વિરામનો ઉપયોગ અમેરિકા પોતાના સૈન્યને ફરીથી સંગઠિત કરવા અને મોટા હુમલા કરવા માટે કરી શકે છે.

આ ભીષણ ટકરાવ વચ્ચે પાકિસ્તાન હવે 'શાંતિ દૂત' તરીકે મુખ્ય ભૂમિકામાં આવ્યું છે. ઇરાને પોતાની તમામ કડક શરતો પાકિસ્તાન દ્વારા અમેરિકા સુધી પહોંચાડી છે. પાકિસ્તાનના વડા પ્રધાન શાહબાઝ શરીફે ઇસ્લામાબાદમાં વાટાઘાટોનું આયોજન કરવાની ઓફર કરી છે, જેમાં યુદ્ધનો કાયમી અંત અને બંધ પડેલી હોર્મુઝની સામુદ્રધુનીને ફરીથી ખોલવાનો રોડમેપ રજૂ કરવામાં આવ્યો છે. જોકે, ઇરાન હજુ પણ સીધી વાટાઘાટોથી દૂર રહી રહ્યું છે અને તે અમેરિકાના દરેક ડગલાને શંકાની નજરે જોઈ રહ્યું છે. ઇરાનનું કહેવું છે કે શાંતિ ત્યારે જ શક્ય છે જ્યારે તેની સાર્વભૌમત્વ અને પરમાણુ સંપત્તિની સુરક્ષાની ગેરંટી મળે.

વૈશ્વિક અર્થતંત્ર માટે સૌથી ચિંતાજનક બાબત હોર્મુઝ છે, જે 28 ફેબ્રુઆરીથી બંધ હોવાથી દુનિયાભરમાં ઊર્જા સંકટ ઘેરી બન્યું છે. જોકે, વાટાઘાટોમાં થોડી આશાનું કિરણ દેખાયું છે કારણ કે ઇરાને ઓમાન સાથે મળીને જહાજોના સુરક્ષિત માર્ગ માટે એક નવી મિકેનિઝમ તૈયાર કરવાના સંકેત આપ્યા છે. તુર્કી અને ઇજિપ્ત પણ આ રાજદ્વારી ગૂંચ ઉકેલવા પ્રયત્નશીલ છે, પરંતુ જ્યાં સુધી યુરેનિયમ અને પાયલોટ રેસ્ક્યૂ મિશન જેવા ગંભીર આરોપોનું સમાધાન નહીં આવે, ત્યાં સુધી મધ્ય પૂર્વમાં યુદ્ધના વાદળો વિખરાય તેવા એંધાણ ઓછા છે.