વોશિંગ્ટન:  અમેરિકી પ્રમુખ ડોનાલ્ડ ટ્રમ્પ અને ઈરાન વચ્ચેનો ગજગ્રાહ હવે વિસ્ફોટક વળાંક પર આવી ગયો છે. વ્હાઇટ હાઉસ ખાતે આયોજિત ઇસ્ટર કાર્યક્રમ દરમિયાન ટ્રમ્પે અત્યંત આક્રમક તેવરમાં જાહેર કર્યું કે ઈરાન દ્વારા આપવામાં આવેલી શાંતિની ઓફર ‘પૂરતી નથી’. ટ્રમ્પે સ્પષ્ટ શબ્દોમાં અલ્ટીમેટમ આપતા કહ્યું કે, હોર્મુઝને ફરીથી ખોલવા માટે મંગળવારે રાત્રે 8 વાગ્યા સુધીનો સમય જ અંતિમ છે અને આ સમયમર્યાદા કોઈ પણ સંજોગોમાં લંબાવવામાં આવશે નહીં. ઈરાનના તાજેતરના પ્રસ્તાવને અપૂરતો ગણાવીને ટ્રમ્પે સંકેત આપ્યો છે કે અમેરિકા હવે માત્ર વાતોથી સંતુષ્ટ નથી, તેને નક્કર કાર્યવાહી જોઈએ છે.

ટ્રમ્પના નિવેદને વૈશ્વિક બજાર અને રાજદ્વારી વર્તુળોમાં ફફડાટ ફેલાવી દીધો છે. તેમણે સીધી ધમકી આપી છે કે જો નિર્ધારિત સમય સુધીમાં ઈરાન અમેરિકાની શરતો સામે શરણાગતિ નહીં સ્વીકારે, તો અમેરિકી વાયુસેના ઈરાનના પાવર પ્લાન્ટ્સ અને મહત્વના પુલો પર વિનાશક હુમલા કરશે. ટ્રમ્પે કટાક્ષ કરતા કહ્યું, "મંગળવાર પછી તેમની પાસે કોઈ પાવર પ્લાન્ટ કે પુલ બાકી નહીં રહે." ઈરાની નેતૃત્વ પર દબાણ વધારતા ટ્રમ્પે એમ પણ ઉમેર્યું કે તેઓ ઈરાનની આર્થિક કરોડરજ્જુ સમાન તેના તમામ તેલ ભંડારો પર કબજો કરવા અને તેને અમેરિકાના હિતમાં વાપરવા પણ સક્ષમ છે, જેથી ઈરાની જનતાની સંભાળ રાખી શકાય.

હાલમાં મધ્યસ્થીઓ દ્વારા બંને પક્ષો વચ્ચે પડદા પાછળ વાટાઘાટો તેજ બની છે, પરંતુ ટ્રમ્પના તાજેતરના વલણથી યુદ્ધવિરામની આશા ધૂંધળી જણાઈ રહી છે. અમેરિકન જનતા પોતાના સૈનિકોને વહેલી તકે ઘરે પાછા ફરતા જોવા માંગે છે, પરંતુ ટ્રમ્પના મતે ઈરાન સામેની આ લડાઈ તેના તાર્કિક અંત સુધી પહોંચવી જરૂરી છે. જો મંગળવારે રાત્રે 8 વાગ્યા સુધીમાં કોઈ સમજૂતી નહીં સધાય, તો મધ્ય પૂર્વમાં એક ભયાનક લશ્કરી સંઘર્ષ ફાટી નીકળવાની પૂરેપૂરી શક્યતા છે. હવે આખી દુનિયાની નજર ઘડિયાળના કાંટા પર છે, જે ઈરાન માટે વિનાશ કે શાંતિનો માર્ગ નક્કી કરશે.