ડિબ્રુગઢ : ભારતીય રાજનીતિમાં મહિલાઓના પ્રતિનિધિત્વને લઈને એક નવો ઇતિહાસ રચાવવા જઈ રહ્યો છે. વડાપ્રધાન નરેન્દ્ર મોદીએ આસામના ડિબ્રુગઢમાં એક વિશાળ જનસભાને સંબોધતા જાહેરાત કરી છે કે, આગામી ૧૬, ૧૭ અને ૧૮ એપ્રિલના રોજ સંસદનું એક ખાસ સત્ર બોલાવવામાં આવશે. આ સત્રનો મુખ્ય ઉદ્દેશ્ય મહિલા અનામત બિલમાં જરૂરી સુધારા કરી, ૨૦૨૯ની લોકસભા ચૂંટણીથી જ મહિલાઓ માટે ૩૩ ટકા અનામતનો અમલ સુનિશ્ચિત કરવાનો છે.
કોંગ્રેસને પીએમ મોદીની ખુલ્લી વિનંતી
વડાપ્રધાને મુખ્ય વિરોધ પક્ષ કોંગ્રેસને આ મામલે રાજકારણથી ઉપર ઉઠીને સમર્થન આપવા આહવાન કર્યું છે. તેમણે કહ્યું કે, "મેં કોંગ્રેસને વિનંતી કરી છે કે તેઓ આ સુધારા બિલને સર્વસંમતિથી પસાર કરવામાં મદદ કરે, જેથી દેશની દીકરીઓ અને બહેનોને સંસદ અને વિધાનસભાઓમાં તેમનો હક મળી શકે." પીએમ મોદીએ ઉમેર્યું કે, ભૂતકાળમાં વર્ષો સુધી આ મુદ્દાને લટકાવી રાખવામાં આવ્યો હતો, પરંતુ NDA સરકાર નારી શક્તિના સશક્તિકરણ માટે પ્રતિબદ્ધ છે.
સીટની સંખ્યામાં પણ થઈ શકે છે મોટો ફેરફાર
સૂત્રોના જણાવ્યા અનુસાર, સરકાર માત્ર અનામત જ નહીં પરંતુ સંસદીય બેઠકોની સંખ્યામાં પણ વધારો કરવાની યોજના બનાવી રહી છે. જો દરખાસ્ત મંજૂર થાય, તો લોકસભાની બેઠકો ૫૪૩ થી વધીને ૮૧૬ થઈ શકે છે, જેમાંથી ૨૭૩ બેઠકો મહિલાઓ માટે અનામત રહેશે. આ માટે મહિલા અનામત સુધારા બિલની સાથે સાથે એક અલગ સીમાંકન (Delimitation) બિલ પણ રજૂ કરવામાં આવે તેવી શક્યતા છે.
કોંગ્રેસનો વળતો પ્રહાર: આચારસંહિતાનો મુદ્દો
બીજી તરફ, કોંગ્રેસે સરકારના આ નિર્ણય સામે વાંધો ઉઠાવ્યો છે. કોંગ્રેસના મહાસચિવ જયરામ રમેશે આરોપ લગાવ્યો છે કે, અત્યારે જ્યારે ચૂંટણીનો માહોલ છે, ત્યારે સંસદનું ખાસ સત્ર બોલાવવું એ આદર્શ આચારસંહિતાનું ઉલ્લંઘન છે. કોંગ્રેસે માંગ કરી હતી કે વિધાનસભા ચૂંટણીઓ પૂર્ણ થયા બાદ ૨૯ એપ્રિલે સર્વપક્ષીય બેઠક બોલાવવી જોઈએ.
કિરેન રિજિજુએ માંગ્યો સહયોગ
કેન્દ્રીય સંસદીય બાબતોના મંત્રી કિરેન રિજિજુએ પણ તમામ પક્ષોને સરકારના કાયદાકીય એજન્ડામાં સહકાર આપવા અપીલ કરી છે. તેમણે જણાવ્યું કે, મહિલા સશક્તિકરણ એ કોઈ પક્ષનો વિષય નથી પરંતુ રાષ્ટ્રની પ્રતિબદ્ધતા છે.
આગામી એપ્રિલ મહિનામાં મળનારું આ ત્રણ દિવસનું ખાસ સત્ર ભારતીય લોકશાહીમાં સ્ત્રી શક્તિના સહભાગી થવા માટેનું નવું પ્રકરણ લખશે કે કેમ, તેના પર હવે સમગ્ર દેશની નજર છે.