નવી દિલ્હી: યુરોપની સાથે સાથે એશિયા અને પેસિફિક ક્ષેત્રના પાંચ મોટા દેશો - ઓસ્ટ્રેલિયા, શ્રીલંકા, થાઈલેન્ડ, ઇન્ડોનેશિયા અને વિયેતનામમાં પણ પેટ્રોલ અને ડીઝલની ભારે અછત સર્જાઈ છે. આ દેશોની સરકારોએ ઈંધણના પુરવઠામાં ઘટાડો અને તણાવપૂર્ણ સ્થિતિની સત્તાવાર રીતે પુષ્ટિ કરી છે, જેનાથી સામાન્ય જનજીવન પ્રભાવિત થયું છે.

ન્યુઝ ફર્સ્ટ અને અલગ અલગ ડિજિટલ ટીવી ચેનલો તેમજ એશિયન મીડિયા રિપોર્ટ્સ મુજબ, વૈશ્વિક ઈંધણ સંકટની અસર હવે એશિયા અને ઓસ્ટ્રેલિયા ખંડમાં પણ ઘેરી બની રહી છે. ઓસ્ટ્રેલિયા, શ્રીલંકા, થાઈલેન્ડ, ઇન્ડોનેશિયા અને વિયેતનામ - આ પાંચેય દેશોએ સત્તાવાર રીતે સ્વીકાર્યું છે કે તેમના દેશમાં પેટ્રોલ અને ડીઝલની શોર્ટ સપ્લાય (અછત) વર્તાઈ રહી છે.

શ્રીલંકામાં અગાઉ પણ ઈંધણની ભારે અછત જોવા મળી હતી, અને હવે ફરી એકવાર દેશમાં તણાવપૂર્ણ સ્થિતિનું નિર્માણ થયું છે, જ્યાં લોકોને પેટ્રોલ પંપ પર કલાકો સુધી ઊભા રહેવું પડે છે. થાઈલેન્ડ, ઇન્ડોનેશિયા અને વિયેતનામ જેવા વિકાસશીલ એશિયન દેશોમાં સપ્લાય ચેન ખોરવાતા વાહનવ્યવહાર અને ઉદ્યોગો પર માઠી અસર પડી રહી છે. 

ઓસ્ટ્રેલિયામાં પણ આયાત પરની નિર્ભરતા અને લોજિસ્ટિક્સની સમસ્યાઓને કારણે ઈંધણનો જથ્થો મર્યાદિત થઈ ગયો છે. વિશ્વભરમાં વધી રહેલી આ સપ્લાય ચેન કટોકટીથી આગામી દિવસોમાં મોંઘવારી વધવાની શક્યતાઓ સેવાઈ રહી છે.