બિષ્ણુપુર: મણિપુરમાં છેલ્લા કેટલાક સમયથી જળવાયેલી શાંતિ ફરી એકવાર લોહિયાળ હિંસામાં ફેરવાઈ ગઈ છે. બિષ્ણુપુર જિલ્લાના મોઇરાંગ ખીણ વિસ્તારમાં આવેલા ટ્રોંગલાઓબી ગામમાં શંકાસ્પદ આતંકવાદીઓએ એક ઘર પર ભયાનક બોમ્બ હુમલો કર્યો હતો. આ કાયરતાપૂર્ણ હુમલામાં ઊંઘી રહેલા 5 વર્ષના માસૂમ છોકરા અને માત્ર 6 મહિનાની બાળકીનું કમકમાટીભર્યું મોત નીપજ્યું છે, જ્યારે તેમની માતા ગંભીર રીતે ઘાયલ થઈ છે. આ ઘટનાને પગલે સમગ્ર રાજ્યમાં ભારે તણાવ વ્યાપી ગયો છે.
લોકરોષ ફાટી નીકળ્યો: ટેન્કરો સળગાવ્યા અને સુરક્ષા દળો સાથે સંઘર્ષ
નિર્દોષ બાળકોના મોતના સમાચાર મળતા જ સ્થાનિક લોકો રસ્તા પર ઉતરી આવ્યા હતા. ઉશ્કેરાયેલા ટોળાએ પેટ્રોલ પંપ નજીક ઉભેલા બે ઓઇલ ટેન્કર અને એક ટ્રકને આગ ચાંપી દીધી હતી. એટલું જ નહીં, પ્રદર્શનકારીઓએ બિષ્ણુપુર-ચુરાચંદપુર સરહદ પર આવેલા સેન્ટ્રલ રિઝર્વ પોલીસ ફોર્સ (CRPF) ના કેમ્પ પર પણ હુમલો કરવાનો પ્રયાસ કર્યો હતો. ભીડને વિખેરવા માટે સુરક્ષા દળોએ કરેલા ફાયરિંગ અને ટીયર ગેસના સેલ છોડતા 19 થી વધુ લોકો ઘાયલ થયા હોવાના અહેવાલ છે.
5 જિલ્લામાં ડિજિટલ બ્લેકઆઉટ અને કડક કર્ફ્યુ
પરિસ્થિતિ વધુ ન બગડે અને સોશિયલ મીડિયા દ્વારા અફવાઓ ન ફેલાય તે માટે મણિપુર સરકારે ઇમ્ફાલ પૂર્વ, ઇમ્ફાલ પશ્ચિમ, થૌબલ, કાકચિંગ અને બિષ્ણુપુર જિલ્લામાં આગામી ત્રણ દિવસ માટે મોબાઇલ ઇન્ટરનેટ સેવાઓ તાત્કાલિક અસરથી બંધ કરી દીધી છે. હિંસાગ્રસ્ત વિસ્તારોમાં મધ્યરાત્રિથી જ કડક કર્ફ્યુ લાદી દેવામાં આવ્યો છે અને વધારાની સુરક્ષા ટુકડીઓ તૈનાત કરવામાં આવી છે.
 
મુખ્યમંત્રીનું કડક વલણ: 'આ આતંકવાદી કૃત્ય છે'
મુખ્યમંત્રી વાય ખેમચંદ સિંહે આ હુમલાની સખત શબ્દોમાં નિંદા કરતા તેને "બર્બર અને માનવતા વિરોધી કૃત્ય" ગણાવ્યું છે. તેમણે ખાતરી આપી છે કે આ માટે જવાબદાર તત્વોને શોધી કાઢીને કાયદા હેઠળ કડકમાં કડક સજા કરવામાં આવશે. બીજી તરફ, સ્થાનિક ધારાસભ્યોએ આ હુમલા પાછળ 'નાર્કો-આતંકવાદીઓ'નો હાથ હોવાનો આક્ષેપ કર્યો છે.
મણિપુરમાં ફરી વળેલા આ હિંસાના વમળને કારણે સામાન્ય જનતામાં ભય અને રોષનો માહોલ છે. શાંતિ પુનઃસ્થાપિત કરવા માટે વહીવટીતંત્ર સતત પ્રયત્નો કરી રહ્યું છે.