ન્યૂયોર્ક : મધ્ય પૂર્વમાં ચાલી રહેલા યુદ્ધ અને હોર્મુઝની સામુદ્રધુની (Strait of Hormuz) પર ઈરાનના કબજાને હટાવવા માટે સંયુક્ત રાષ્ટ્ર સુરક્ષા પરિષદમાં લાવવામાં આવેલો અમેરિકા સમર્થિત પ્રસ્તાવ નિષ્ફળ રહ્યો છે. મંગળવારે ૭ એપ્રિલના રોજ રશિયા અને ચીને આ પ્રસ્તાવ વિરુદ્ધ વીટો પાવરનો ઉપયોગ કરીને અમેરિકાને મોટો રાજદ્વારી ઝટકો આપ્યો છે. આ મતદાન એવા સમયે થયું છે જ્યારે અમેરિકી રાષ્ટ્રપતિ ડોનાલ્ડ ટ્રમ્પ દ્વારા ઈરાનને આપવામાં આવેલી ડેડલાઈન પૂર્ણ થવાને ગણતરીના કલાકો જ બાકી છે.

**૧૧ દેશોના સમર્થન છતાં પ્રસ્તાવ પડતો મુકાયો:**
સુરક્ષા પરિષદમાં થયેલા મતદાનમાં અમેરિકા, બ્રિટન, ફ્રાન્સ અને બહેરીન સહિત ૧૧ દેશોએ પ્રસ્તાવની તરફેણમાં મતદાન કર્યું હતું, જ્યારે પાકિસ્તાન અને કોલંબિયા મતદાનથી અલિપ્ત રહ્યા હતા. જોકે, રશિયા અને ચીને વીટો વાપરતા આ ઠરાવ પસાર થઈ શક્યો નથી. રશિયા અને ચીને આ પ્રસ્તાવને યુદ્ધ માટેનું બહાનું ગણાવ્યું હતું. ઉલ્લેખનીય છે કે, અગાઉ રશિયા અને ફ્રાન્સના વિરોધને પગલે પ્રસ્તાવના મુસદ્દામાંથી 'તમામ જરૂરી માધ્યમો' (જેનો અર્થ લશ્કરી કાર્યવાહી થાય છે) જેવો શબ્દપ્રયોગ હટાવી લેવામાં આવ્યો હતો, તેમ છતાં રશિયા-ચીને સમર્થન આપવાનો ઇનકાર કર્યો હતો.

**અમેરિકી રાજદૂતનો આકરો પ્રહાર:**
વીટો બાદ અમેરિકી રાજદૂતે સુરક્ષા પરિષદમાં અત્યંત આક્રમક સંબોધન કર્યું હતું. તેમણે જણાવ્યું હતું કે, "આજનું વીટો જવાબદારી ઉપર અવરોધ પસંદ કરવાની નીતિ દર્શાવે છે. જ્યારે વિશ્વમાં તેલ અને અન્ય પુરવઠો અટકશે ત્યારે દુનિયા જાણશે કે આ અવરોધ માટે કોણ જવાબદાર છે." રાજદૂતે ઈરાન અને તેને મદદ કરનારા દેશો પર પ્રહાર કરતા કહ્યું કે રશિયા ઈરાનને હથિયારો પૂરા પાડે છે અને ચીન ઈરાનનું ૮૦% ગેરકાયદે તેલ આયાત કરે છે.

**વિશ્વના ૨૦% તેલ પુરવઠા પર જોખમ:**
હોર્મુઝની સામુદ્રધુની વિશ્વના કુલ તેલ વપરાશના અંદાજે ૨૦% પુરવઠા માટેનો મહત્વનો માર્ગ છે. ૨૮ ફેબ્રુઆરીના રોજ અમેરિકા-ઈઝરાયેલના હુમલા બાદ ઈરાને આ માર્ગ બંધ કરી દેતા વૈશ્વિક ઉર્જા સંકટ સર્જાયું છે અને ઈંધણના ભાવ આસમાને પહોંચ્યા છે. અમેરિકી રાજદૂતે અંતમાં ચેતવણી આપતા ઉમેર્યું કે, "૪૭ વર્ષ પહેલા ઈરાને અમેરિકી નાગરિકોને બંધક બનાવ્યા હતા અને આજે તે હોર્મુઝની સામુદ્રધુનીને બંધક બનાવી રહ્યું છે. આ ઈરાનનું છેલ્લું કૃત્ય હોઈ શકે છે."

**ટ્રમ્પની ડેડલાઈન અને યુદ્ધના વાદળો:**
રાષ્ટ્રપતિ ડોનાલ્ડ ટ્રમ્પે ઈરાનને રાત્રે ૮ વાગ્યા સુધીનું અલ્ટીમેટમ આપ્યું છે કે જો હોર્મુઝનો માર્ગ ખોલવામાં નહીં આવે તો ઈરાનના પાવર પ્લાન્ટ્સ અને બ્રિજ પર ભયાનક હુમલા કરવામાં આવશે. સંયુક્ત રાષ્ટ્રમાં પ્રસ્તાવ નિષ્ફળ જતા હવે અમેરિકા સીધી સૈન્ય કાર્યવાહી કરશે કે કેમ તેના પર સમગ્ર વિશ્વની મીટ મંડાયેલી છે. બીજી તરફ ઈરાને સોશિયલ મીડિયા પર ટ્રમ્પની મજાક ઉડાવતા લખ્યું છે કે તેઓ પથ્થર યુગમાં જીવી રહ્યા નથી. મધ્ય પૂર્વમાં અત્યારે ભારેલા અગ્નિ જેવી સ્થિતિ પ્રવર્તી રહી છે.