નવી દિલ્હી: ઈરાન અને અમેરિકા વચ્ચે ચાલી રહેલું તણાવ હવે ચરમસીમાએ પહોંચી ગયું છે. ઈરાનમાં ગમે ત્યારે ભીષણ હુમલા થવાની આશંકાને જોતા ત્યાંના ભારતીય દૂતાવાસે અત્યંત મહત્વની 'ઇમરજન્સી એડવાઇઝરી' જારી કરી છે. દૂતાવાસે ઈરાનમાં રહેતા તમામ ભારતીય નાગરિકો અને ખાસ કરીને વિદ્યાર્થીઓને આગામી 48 કલાક માટે ઘરની બહાર ન નીકળવા અને તમામ બિનજરૂરી પ્રવાસ ટાળવા કડક સૂચના આપી છે. પરિસ્થિતિ એટલી ગંભીર છે કે કોઈપણ ક્ષણે મોટું સૈન્ય ઓપરેશન શરૂ થઈ શકે છે.
ડોનાલ્ડ ટ્રમ્પની 'વિનાશક' ચેતવણી
અમેરિકાના રાષ્ટ્રપતિ ડોનાલ્ડ ટ્રમ્પે ઈરાનને મંગળવાર રાત સુધીની અંતિમ સમયમર્યાદા (ડેડલાઈન) આપી છે. ટ્રમ્પે સ્પષ્ટ શબ્દોમાં ચેતવણી આપી છે કે જો હોર્મુઝ સ્ટ્રેટ ફરીથી ખોલવામાં નહીં આવે, તો અમેરિકા ઈરાનના તમામ પાવર પ્લાન્ટ્સ અને પુલોનો નાશ કરી દેશે. ટ્રમ્પના આ નિવેદન બાદ ઈરાનમાં ગભરાટ ફેલાયો છે. ઈરાની અધિકારીઓએ તો યુવાનોને પાવર પ્લાન્ટ્સની આસપાસ 'માનવ સાંકળ' બનાવીને રક્ષણ કરવા માટે અપીલ કરી છે.
વૈશ્વિક અર્થતંત્ર પર ખતરો
હોર્મુઝ સ્ટ્રેટ દુનિયા માટે અત્યંત મહત્વનો જળમાર્ગ છે, કારણ કે વિશ્વનો લગભગ 20 ટકા તેલ પુરવઠો અહીંથી પસાર થાય છે. ઈરાને આ માર્ગ પર પોતાની પકડ જમાવી રાખી છે, જેને કારણે વૈશ્વિક તેલના ભાવો અને અર્થતંત્ર પર જોખમ તોળાઈ રહ્યું છે. તાજેતરમાં ઈરાને ઈઝરાયલ અને સાઉદી અરેબિયા પર પણ મિસાઈલ અને ડ્રોન હુમલા કર્યા છે, જેના કારણે ઈઝરાયલે ઈરાનના રેલ્વે નેટવર્ક અને ઈકોનોમીને નુકસાન પહોંચાડવાની ધમકી આપી છે.
ભારતીયો માટે હેલ્પલાઇન નંબર
ભારતીય વિદેશ મંત્રાલય સ્થિતિ પર સતત નજર રાખી રહ્યું છે. ઈરાનમાં હાજર ભારતીયોને દૂતાવાસના સંપર્કમાં રહેવા અને સત્તાવાર સૂચનાઓનું જ પાલન કરવા જણાવાયું છે. વિશ્વભરના નેતાઓ અત્યારે ટ્રમ્પને આ વિનાશક યુદ્ધ રોકવા વિનંતી કરી રહ્યા છે, કારણ કે નિષ્ણાતો માને છે કે આવા હુમલા યુદ્ધ અપરાધ (War Crimes) ની શ્રેણીમાં આવી શકે છે.