ઓસ્ટિન (ટેક્સાસ), તા. 8: ગયા મહિને ટેક્સાસમાં બનેલી ગોળીબારની એક કમનસીબ ઘટનામાં 21 વર્ષીય ભારતીય મૂળની વિદ્યાર્થીની સવિતા શનમુગસુંદરમે પોતાનો જીવ ગુમાવ્યો હતો. આ આઘાતમાંથી બહાર આવીને તેના માતા-પિતા અને મિત્રોએ સવિતાના શિક્ષણ પ્રત્યેના લગાવ અને ગરીબ વિદ્યાર્થીઓને મદદ કરવાના તેના જુસ્સાને જીવંત રાખવા માટે એક ઐતિહાસિક નિર્ણય લીધો છે. પરિવારે ટેક્સાસ યુનિવર્સિટી (UT) સાથે મળીને જરૂરિયાતમંદ વિદ્યાર્થીઓ માટે એક મોટી શિષ્યવૃત્તિ (Scholarship) ફંડની જાહેરાત કરી છે.
$10 લાખનું વિશાળ ભંડોળ
સવિતાનો પરિવાર આ શિષ્યવૃત્તિ માટે $5,00,000 એકત્ર કરવાની યોજના બનાવી રહ્યો છે. ખાસ વાત એ છે કે, યુનિવર્સિટીના 'ટેક્સાસ ચેલેન્જ પ્રોગ્રામ' હેઠળ આટલી જ રકમ સંસ્થા તરફથી ઉમેરવામાં આવશે, જેનાથી કુલ $10 લાખ (અંદાજે 8.3 કરોડ રૂપિયા) નું કાયમી ભંડોળ તૈયાર થશે. આ ભંડોળમાંથી દર વર્ષે 8 થી 10 ગરીબ વિદ્યાર્થીઓને ઉચ્ચ શિક્ષણ માટે નાણાકીય સહાય પૂરી પાડવામાં આવશે.
પુત્રીનું સ્વપ્ન હવે બનશે હકીકત
સવિતાના પિતા શાન મુથિયને ભારે હૈયે જણાવ્યું હતું કે, "મારી દીકરી હંમેશા ગરીબ અને વંચિત વિદ્યાર્થીઓની સેવા કરવા માટે ઉત્સાહી હતી. આ શિષ્યવૃત્તિ દ્વારા તેનું એ સ્વપ્ન સાકાર થઈ રહ્યું છે. આનાથી ખાતરી થશે કે તેનો વારસો હંમેશ માટે જીવંત રહે." સવિતાની માતાએ પણ ઉમેર્યું હતું કે, તેઓ આ સેવાકાર્ય દ્વારા સવિતાના જીવનની ઉજવણી કરવાનું ચાલુ રાખશે.
શિક્ષણની અતૂટ સાંકળ
પરિવાર અને મિત્રોના મતે, આ પહેલ સવિતાના વ્યક્તિત્વનું પ્રતિબિંબ છે. તે હંમેશા બીજાને મદદ કરવામાં અગ્રેસર રહેતી હતી. આ શિષ્યવૃત્તિનો હેતુ માત્ર આર્થિક મદદ પૂરતો મર્યાદિત નથી, પરંતુ પિતા શાન માને છે કે જે વિદ્યાર્થીઓ આ ફેલોશિપ મેળવશે, તેઓ ભવિષ્યમાં બીજાને મદદ કરીને આ સેવાની સાંકળને આગળ વધારશે.
કાયમી સ્મારક તરીકે સેવા
ટેક્સાસ યુનિવર્સિટી આ ભંડોળનું સંચાલન એક કાયમી દાન તરીકે કરશે. 'ટાઇટલ I' શાળાઓમાં ભણતા એટલે કે આર્થિક રીતે પછાત વિદ્યાર્થીઓ માટે આ એક મોટી તક સાબિત થશે. વિદેશની ધરતી પર એક ભારતીય પરિવારે પોતાની પુત્રીના મૃત્યુના શોકને જે રીતે અન્યના જીવનમાં ઉજાસ ફેલાવવાની તકમાં ફેરવ્યો છે, તેની સમગ્ર અમેરિકામાં પ્રશંસા થઈ રહી છે.
સવિતાના મિત્રોનું કહેવું છે કે, "આ ભંડોળ ખરેખર તે કેવી રીતે જીવતી હતી તેની સાબિતી છે." એક તેજસ્વી તારાના અકાળ અસ્ત બાદ હવે સેંકડો વિદ્યાર્થીઓના જીવનમાં સવિતાના નામે જ્ઞાનનો દીવો પ્રજ્વલિત રહેશે.